DILI, STLNEWS.co – Daudaun nee projetu emerjensia iha Munisipiu Manufahi hahu lao, ba infraestrutura neebe hetan estragus husi situasaun kalamidade, tanba nee husu kompanhia responsabilidade ba kualidade.
Kestaun nee hatoo husi Administrador Munisipiu Manufahi, Arantes Isaac Sarmento katak, kondisaun estrada ho ponte neebe hetan estragus husi situasaun kalamidade, daudaun nee hetan ona intervensaun emerjensia husi governu liu husi Ministeriu Obras Publiku (MOP), orienta ona kompanhia 4, halo ona projetu emerjensia.
Tuir Arantes, empreza sira neebe hetan konfiansa husi governu fo hodi halao projetu nee entermus tekniku, finanseiru, no rekursu diak, tanba nee ita bele garante kualidade diak ba projetu nee, tanba governu fo konfiansa tanba povu, tanba nee tenki kumpri regras neebe iha.
“Hau husu ba empreza neebe kaer projetu ho responsabilidade, labele uza obra nee hanesan oportunidade hodi hetan deit osan, maibe importante iha responsabilidade ba kualidade”, katak Administrador Munisipiu Manufahi Arantes Isaac Sarmento ba STL Sesta (13/10/2023) via telefone iha Munisipiu Manufahi.
Nia dehan, projetu emerjensia nee, lao iha area urbana, neebe iha area urbana tempu udan laiha problema, tanba kompanhia sira servisu hela.
Maibe administrador nee preokupa, liu iha area rural, hanesan Daisua, Grotu, Turiskai, Mindelo, Fahinehan, Bususu, no seluk tan foin dadaun nee hetan estragus, neebe lakonsege rezolve tempu udan agora sei estraga liu tan. Tanba nee iha Orsamentu Jeral Estadu (OJE) ba tinan 2024 sira tau hotu iha prioridade, maibe simu envelope fiskal osan nee redus maka.
Nia dehan, kompanhia 4 neebe halao hela projetu emerjensia nee ba pakote estrada ho ponte dala ida, hanesan iha parte Lihilolo, Karbulau, Rai-Kuak, sira nee daudaun projetu lao hela, neebe normalmente projetu emerjensia nee tarjetu fulan 3, finaliza konstrusaun, labele liu husi nee, se liu husi nee laos projetu emerjensia maibe projetu plurianual.
Tuir nia, kompania sira nee mesak Timor oan, tanba nee nudar Timor oan halo servisu diak ba Timor no diak ba povu.
(gui)
