BOBONARO, STLNEWS.co – Oras nee daudaun Eskola Baziku Sentral (EBC – sigla portugues) Raifun la sufisiente ba estudante sira hodi tuir aprendizajen, tanba numeru estudante barak liu.
Kestaun nee hatoo husi Diretor EBC Raifun, Padricio Duarte ba jornalista sira iha Salaun EBC Raifun, Munisipiu Bobonaro, Segunda nee (25/04/2022).
“Sala difinitivu 10, sala emerjensia iha 6 neebe mak la sufisiente ba labarik sira hodi tuir aprendizajen, tanba sala de aulas neebe didin ho bebak nee komesa monu ona tanba dodok, maibe sira kontinua fo aprendizajen ba labarik,” hatete nia.
Nia tenik, sala de aula la sufisiente tanba klot liu, no mos aula nia didin sira komesa dodok no balu monu sai ona, tanba nee labele akumula ba labarik 50 pesoas ba iha aula ida emerjensia nee.
Iha fatin hanesan, Profesor Maria de Oliveira informa, sala de aula emerjensia nee la sufisiente para estudante sira atu aprendizajen, tanba fatin klot liu no mos iha bebak balu neebe dodok ona no monu, tanba nee wainhira udan sira labele fo aprendizajen neebe diak ba estudante sira.
Nunee mos estudante Julia Ximenes informa, sala de aula ba sira estudante nee la sufisiente, tanba fatin antigu no klot liu, tanba nee sira atu dada iis mos labele, tanba estudante barak mak tuir aprendizajen.
“Hau senti tristi, tanba ami nia eskola fatin la too para ami hodi tuir aprendizajen, tanba fatin nee kaundu anin no udan nee ami fila ba uma deit, tanba udan tama no mos kalan tarutu loos wanihira udan,” nia informa.
(jen)
