Semana Ida Povu Fatubessi Moris Nakukun

Povu Munisipiu Ermera, Suku Fatubessi, kuaze semana ida ona, lahetan naroman husi ahi elektrisidade tanba impaktu husi anin no udan boot, aimonu silu tohar airin elektrisidade rua iha area Fatubessi, rezulta komunidade moris iha nakukun laran. (Foto: STL/Blandina Mauno)

FATUBESSI, STLNEWS.co – Povu Munisipiu Ermera, Suku Fatubessi, kuaze semana ida ona, lahetan naroman husi ahi elektrisidade tanba impaktu husi anin no udan boot, aimonu silu tohar airin elektrisidade rua iha area Fatubessi, rezulta komunidade moris iha nakukun laran.

Tuir negosiante, Ermelinda Corte Real sente triste tanba kuaze semana ida ona lahetan naroman elektrisidade tanba impaktu husi ahi monu silu tohar airin elektrisidade, nunee fo impaktu ba sira iha nakukun laran.

“Ami sente triste tanba kuaze semana ida ona, ami lahetan naroman husi ahi elektrisidade tanba impaktu husi aimonu baku tohar airin rua iha area Fatubessi. Tanba nee ami husu ba responsabel EDTL atu toma konsiderasaun ba problema nee,” dehan nia ba STL iha Ermera Fatubessi Sesta Kalan (04/12/2020).

Nia haktuir katak durante nee ahi lakan normal hela maibe iha semana ida nee nia laran akontese anin no udan boot mak aisamtuku monu estraga fiu elektrisidade iha Fatubessi.

Iha okaziaun nee Zinha da Conceição, nuudar sarani husi Igreja Santo Antonio Motael hatoo pensamentu triste tanba hanesan vizitante ba programa peregrinasaun katak ahi mate hanesan ladun diak, tanba hanesan vizitante iha Fatubessi haree povu moris iha nakukun laran vez.

“Hau sente ladun diak tanba hanesan vizitante primeira vez, liu husi programa peregrinasaun neebe kria husi Igreja Parokia Santo Antonio Motael, kalan ami hare povu Fatubessi moris iha nakukun laran tanba nee hanesan vizitantes husi Dili mai Fatubessi triste,” nia hatete.

Tuir observasaun STL iha Fatubessi vizitantes ba programa peregrinasaun halao misa iha nakukun laran deit hamutuk ho sarani Fatubessi no Parokia Motael.

Alende nee, negosiante neebe mak faan sasan uza deit lilin balun uza solar panel maibe laguenta too kalan boot, tanba agora tempu udan.

Reportajen: Blandina Mauno
Editor: Ekipa STL

LEAVE A REPLY

Please enter your comment!
Please enter your name here