DILI, STLNEWS.co — Sentru votasaun Eskola Bazika Filial (EBF) Ossolia, Aldeia Uai-Dora, Suku Letemumu, Postu Administrativu Kuelikai, Munisipiu Baukau, kandidatu Prezidente Republika (PR) numeru 1 Jose Ramos Horta hetan mais votantes.
Kandidatu numeru 1 Jose Ramos Horta hetan votantes 118, kandidatu numeru 2 Francisco Guteres Lu Olo hetan votantes 117, nulu 2, abandonadu 0, rejeitadu 0, branco 0 no reklamadu 0.
Iha fatin hanesan, Xefi Suku Letemumu, Paulo Moreira Soares husu ba kandidatu Prezidente Republika (PR) nain 2, ida neebe mak eleitu asegura nafatin nasaun ida nee ho interese komun no mos halo dezenvolvimentu ho diak iha nasaun ida nee.
“Ami nudar lideransa ba nain rua nee, ida neebe mak sae nee Prezidente Republika ba nasaun, i depois komunidade sira nee hein Prezidente Republika ida neebe mak sae naran katak asegura nasaun ida nee ho interese komun, hodi nunee bele apoiu ba governu i parlamentu kuandu aprova orsamentu karik bele halo promulgasaun para halo dezenvolvimentu iha nasaun ida nee nia laran, liu – liu iha Suku Letemumu,” dehan Xefi Suku nee.
Nia hatete, iha sentru votasaun nee anunsiu husi brigada hodi koke, no iha sentru votasaun refere observador nain sira husi nasional mak halo observasaun, nunee mos fiskais sira neebe mak iha sentru votasaun nee husi partidu rua nian mak CNRT no FRETILIN, no observasaun husi fiskais no poling staf sira neebe mak iha sentru votasaun nee hamutuk 11.
(EST/02)