Simu Tinan Foun, Joven 1 Hetan Tiru


VIKEKE, STLNEWS.co – Joven feto ida ho inisial MA, deskonfia hetan tiru husi membru Polisia Nasional Timor-Leste (PNTL) iha Suku Vesoru, Postu Administrativu Uatolari, Munisipiu Vikeke, bainhira simu tinan foun 2024.

Tuir Xefe Suku Vesoru, Paulo Fernandes katak, bainhira simu tinan foun iha tuku 00:30 OTL, mosu duni problema iha Suku Vesoru entre joven sira husi Aldeia Kuludere no Aldeia Bahaao.

Tuir nia, kronolojia husi problema entre joven sira husi Aldeia Kuludere no Aldeia Bahaao mak joven sira husi Aldeia Balasiba atu ba partisipa festa ida suku laran, maibe too iha dalan klaran joven nain 2 nee hetan baku, joven sira deskonfia husi Aldeia Bahaao. Husi agresaun nain ida monu hela, ida konsege halai tama Aldeia Kuludere laran, no sira duni tuir joven nee too tuda ema sei reja hela iha uma ida rahun hotu inklui Xefi Aldeia Kuludere nia uma.

“Sim, momentu akontese hau iha hela uma no hetan informasaun nee husi telefone katak, joven ida hetan tiru duni, maibe ita seidauk hatene los polisia tiru uza peluru karet ga kilat musan tebes, neebe prosesu invesifgasaun mak ita foin bele hatene,” hatete Xefi Suku Vesoru ba STL liu husi telefone, Segunda (01/01/2024).

Nia hatutan, husi akontesimentu nee polisia tula kedas vitima hetan tiru ba iha Vikeke vila hodi halao tratamentu.

“Polisia eskuadra Postu Administrativu Uatukarbau no Unidade Corpu Operasaun Espesial (COE) tun kedas halo atuasaun no netraliza kedas situasaun, no vitima hetan tiru no nain 4 seluk hodi kalan kedas tula ona ba Vikeke vila hodi halo tratamentu,” esplika nia.

Aleinde iha konfrontu entre joven sira husi Aldeia kuludere no Aldeia Bahaao polisia kaptura ema nain 4 husi Aldeia Bahaao hodi prosede ba prosesu investigasaun.

Entretantu, too tun nia publika, Polisia Nasional Timor-Leste (PNTL) liu-husi eskuadra Postu Administrativu Uatokarbau-Uatolari seidauk halo komentariu ruma.

(Ekipa STL)

LEAVE A REPLY

Please enter your comment!
Please enter your name here