SS Estudante Lao Ain Dili – Same, Florencia: Ami Lahusik Livre, Hatama Kuarentena

Diretora Saude Munisipiu Manufahi, Florencia Corte-Reál Tilman. (Foto: Espesial)

DILI, STLNEWS.co – Relasiona ho estadu emerjensia (EE) ba dala 12, nunee mos implementa serka sanitaria (SS) iha munisipiu Dili, halo estudante Manufahi oan abele hela iha Dili, tanba nee estudante barak lao ain husi Dili ba Same. Maibe ekipa saude iha Same lahusik livre, lori kedas ba iha kuarentena.

Diretora Saude Munisipiu Manufahi, Florencia Corte-Reál Tilman hatete, depois de estadu emerjensia (EE) ba dala 12, no mos serka sanitaria (SS) iha Dili, estudantes Manufahi oan barak mak viajem sem karta lisensa husi Sentru Integradu Jestun Krize (SIJK) lao ain deit husi Dili ba too Same.

“Agora dadaun ami rejistu 145 estudante lao ain, Dili – Same, husi total nee foin horkalan (Kuarta kalan), too ba iha Same 90 resin estudante no ohin Kinta nee, foin too tan 30 resin neebe viajem husi Dili ba Same. Ekipa saude prepara hela fatin kuarentena hodi tau sidadaun sira nee ba. Estudante sira nee mai laiha karta lisensa husi SIJK ka viajem ilegal, tanba nee ami sei lahusik ema se deit tama Manufahi livre, ka laiha karta lisensa no rezultadu swab, kuandu sira tama ami lori kedas ba kuarentena”, informa Florencia ba STL, via telefone Kinta (08/04/2021).

Diretora nee hatete, sira parte saude iha Manufahi, nafatin halo sensibiliza komunidade sira atu prevene aan husi Covid-19, iha sensibilizasaun nee, ekipa saude servisu hamutuk ho parseiru nasional no internasional, hodi fahe informasaun ba komunidade sira.

Sira mos forma komisaun ida hodi kontrola ba situsaun nee, komisaun nee lidera direta husi administrador munisipiu Manufahi, Vise mak komandante Polisia Manufahi, inklui nia rasik hodi orienta membru sira hotu iha baze no halo sensibiliza informasaun ba komunidade sira, atu matan moris, neon moris ba sidadaun viajem husi Dili ba Same, atu nunee labele halo sidadaun sira tama laiha karta lisensa ka via ilegal no laiha rezultadu swab, tama livre.*

Reportajen: Guilhermina Franco
Editor: Ekipa STL

LEAVE A REPLY

Please enter your comment!
Please enter your name here