Tempu Udan, Estrada Baguia Nakfilak Ba Mota

Tempu udan, estrada Postu Administrativu Baguia nebee mak partense iha munisipiu Baucau, nakfilak ba mota tanba laiha bee dalan. (Foto: STL/Emerenciana Pinto)

BAUCAU – Tempu udan, estrada Postu Administrativu Baguia nebee mak partense iha munisipiu Baucau, nakfilak ba mota tanba laiha bee dalan.

Kestaun nee hatoo husi Administrador Postu Administrativu Baguia, Antonio dos Ramos ba STL via telefone, Kuarta (20/01/2021) hatete estrada iha postu Administrativu Baguia bainhira tempo udan estrada publiku diresaun Laga ba Baguia kontinua aumenta aat tamba bee dalan laiha.

Administrador nee hatutan, hahu iha loron 31 fulan Dezembru tinan 2020 tinan tuan nian too agora udan makaas liu liu ba estrada publiku diresaun husi Laga ba Baguia, nomos ba suku sira iha Postu Baguia ladiak ona.

“Iha tinan kotuk kompania balun ba ateru, maibe bee dalan laiha, udan makaas nee bee dalan laiha entaun bee nee sei tama ba estrada sira, lakleur estrada sira sai fali mota nee mak agora dadaun akontese maibe, seidauk rezulta komunidade nia uma, plantasaun no toos ka natar seidauk iha informasaun maibe agora dadaun ami observa nee, estrada ida hau temi nee mak agora aat ba bebeik.” dehan Administrador Postu Baguia.

Autoridade masimu Baguia nee hatutan, iha postu laiha orsamentu atu hadia dalan maibe hatoo deit proposta ou pedidu ba diresaun leten no ba ministeriu kompetente mak bele hadia.

Antonio hateten, sira akompana televisaun ou media sosial Ministeiru Obras Publiku fo sai, dehan estrada diresaun laga ba baguia, inklui ponte mota samalari tama ona planu maibe bainhira mak implementa seidauk hatene.

“Ami nia planu mak so halo deit pedidu no halo deit proposta mai iha leten maibe so nasional ho munisipiu mak bele hatene ida nee ami laiha orsamentu atu halo ida nee.” dehan Antonio.

Antonio hatutan, proposta nee laos deit iha oitavu governu, maibe hahu husi sestu governu, setimu governu, too iha oitavu governu.

Nia hatutan, laos deit proposta maibe vizita Presidente Republika iha Munisipiu Baucau no mos ho Ministeiru sira, Autoridade Lokal no Autoridade Komunitariu sira ho Komunidade kontinua kestiona tamba estrada publiku diresaun laga ba bagiua, no postu baguia ba suku sira kontinua aat bainhira tempo udan.*

Reportajen: Est.To
Editor: Ekipa STL

LEAVE A REPLY

Please enter your comment!
Please enter your name here