LAUTEM, STLNEWS.co – Oras nee daudaun transporte tum-tum mak domina iha Postu Administrativu Lospalos, Munisipiu Lautem.
“Ita haree agora nee kareta tum-tum domina iha Lospalos Kota, no agora pasajeirus uza mak tum-tum laiha transporte publiku seluk,” dehan Pasajeirus Kareta Tum-Tum, Erfina Monteiro da Silva ba STL iha Lospalos Sentral, Kinta (31/08/2023).
Nia dehan, transporte publiku hanesan mikrolet no taxi iha Lospalos laiha, maibe kareta tum-tum mak agora tula ona pasajeirus, kada ema ida selu ho 0,50 sentavus, nain rua selu US$ 1.
“Mikrolet uluk iha, agora ita uza deit mak kareta tum-tum, hau senti tum-tum nee diak, tanba dook ka besik ita selu 0,50 sentavus deit, depois labarik kiik oan sira nee la selu,” nia esplika.
Iha fatin hanesan, pasajeirus Anita Ximenes deklara, transporte tum-tum ajuda tebes pasajeirus sira hodi fasilita sira lao ba mai iha Lospalos Kota.
“Transporte tum-tum nee fasilita ita hodi ba merkadu no mai iha loja, nomos tula ita too iha uma, tanba nee hau senti tum-tum nee diak,” nia informa.
Nunee mos Motorista Faustino Moko da Silva esplika, transporte tum-tum mak agora domina ona Lospalos Kota, bele fasilita estudante ba asesu apredenzajen, no ajuda komunidade asesu merkadu.
“Tum-tum nee ajuda tebes estudante sira ba asesu apredenzajen no ajuda ita nia komunidade asesu merkadu,” nia deklara.
Nia hatutan, transporte tum-tum ajuda mos ekonomia familia, tanba tum-tum loron ida hetan osan US$ 17, ida nee ajuda tebes ekomomia uma laran.
“Loron ida hau hetan US$ 17 dala ruma US$ 20, ida nee ajuda tebes hodi responde nesisidade uma laran, depois besik ka dook kada ema ida 0,50 sentavus,” nia afirma.
(jen)
