DILI, STLNEWS.co – Udan neebe akontese iha loron Kinta horiseik (16/03/2023) halo ponte ida iha Suku Estadu, Munisipiu Ermera Vila, Munisipiu Ermera, kotu total.
“Akontese inundasaun mota tun sobu ponte ida mout tun hotu, tanba nee komunidade viajen ba Gleno la diak, motor deit mos liu la diak,” dehan Xefi Suku Estadu Domingos Salsinha iha Ermera ba STL, Sesta (17/03/2023).
Domingos afirma, ponte ida hetan estragus total, no ameasa mos ba uma ida neebe besik mota ninin, tanba nee se udan mak mai tan, mota boot uma nee bele hetan estragus ona.
Oras nee daudaun husi parte ekipa protesaun sivil mak ba iha neeba, maibe seidauk iha rezultadu ruma husi sira. No xefi suku rasik ba iha autoridade munisipial maibe la iha fatin, tanba nee sei hein Segunda mak lori fali pedidu ba.
Salsinha sublinha, oras nee daudaun komunidade husi suku tolu hanesan Estadu, Raimerhei no Koliate movimentu ba mai seidauk diak, tanba ponte oan nee kotu, maski komunidade sira esforsu aan tau deit ai, atu fasilita komunidade sira neebe lao ain.
Husu atu parte kompetente bele haree lalais ba kestaun nee, atu responde lalais ba situasaun neebe sira hasoru, ka responde emerjensia oinsa bele kria lalais kondisaun ruma neebe diak, hodi fasilita komunidade sira nia viajen ba mai.
Tanba, se ponte nee kontinua husik deit, difikulta mos inan isin rua sira neebe ba mai hodi halo tratamentu, nomos estudante sira neebe halao hela estudu, tanba udan boot mota tun sira labele liu ba mai hodi halao estudu iha eskola rua neebe iha.
Iha fatin ketak, Prezidente Autoridade Munisipiu Ermera, Eusebio Salsinha dehan, bainhira akontese situasaun sira hanesan nee, iha ekipa dezastre naturais mak tun ba direitamente hodi haree.
“Bainhira akontese hanesan nee iha servisu munispiu dezastre naturais sei tun ba haree halo levantamentu, informa ba prezidente autoridade atu halo medidas urejensia nee oinsa,” dehan Prezidente nee.
Nia reforsa, maski husi dezastre naturais seidauk informa ba prezidente autoridade, maibe prezidente iha konhesimentu, katak iha ponte tolu mak aat nanis ona, ponte rua iha Suku Estadu no ponte ida iha Suku Raimerhei.
Tuir Salsinha, ponte nee husi UNDP mak sei halo, sira halo ona levantamentu ba ponte tolu nee, hein deit atu halo BOQ, hodi hahu nia kontrusaun ona.
(ter)
