UFD Kapasita Joven Liu Husi Formasaun Non Formal

Asosiasaun Unidade Feto Ba Dezenvolvimentu UFD kapasita joven sira liu husi formasaun non formal iha area oin oin. (Foto: STL/Emerenciana Pinto)

BAUCAU, STLNEWS.co – Asosiasaun Unidade Feto Ba Dezenvolvimentu UFD kapasita joven sira liu husi formasaun non formal iha area oin oin.

Informasaun nee hatoo husi Diretora UFD Bendita de Jesus Amaral ba STL iha nia knaar fatin UFD Lanut, Segunda (12/10/2020).

Diretora dehan UFD oras nee prepara hela programa oinsa mak kapasita joven sira liu husi formasaun non formal iha Munisipiu Baucau iha area neebe mak diferente.

“Oras nee dadaun UFD prepara hela programa kapasitasaun non formal hodi fasilita ba ita nia joven sira iha Munisipiu Baucau no iha nee joven barak mak inklina no involve aan hodi mai partisipa mos iha formasaun refere” dehan Diretora UFD.

Diretora nee hatutan iha programa neebe mak UFD prepara atu kapasita joven sira mak hanesan jornalismo, administrasaun, komputador, Portugues, Ingles, nunee mos lideransa.

Jornalista STL, Emerenciana Pinto halo intervista ho Diretora UFD Bendita de Jesus Amaral, iha nia knaar fatin UFD Lanut, Segunda (12/10/2020). (Foto: STL)

Bendita hatutan estudante neebe mak tuir iha formasaun etapa premeiru hamutuk nain 26 no hetan ona sertifikadu. Nunee mos formasaun etapa tuir mai nee hetan mos Apoiu husi Embaixada Portugal liu husi Institutu CAMÕES hodi oferese materiais hanesan komputador, printer, projektor espedol nunee mos materiais neebe formador sira uja hodi hanorin ba joven sira.

Nia hatutan oras nee difikuldade neebe mak UFD hasoru mak fatin tanba estudante barak mak hakarak aprende, maibe fatin mak limitadu tanba nee sira simu estudante balun deit.

“Nunee mos konaba jornalismo nia difikuldade neebe mak hasoru kona mos ba fatin no segundu haree mos fila fali ba ita nia material sira atu nunee bainhira teori hotu ona presiza mos pratika maibe sasan neebe mak uja atu pratika difisil entau ate agora UFD buka esforsu hodi fasilita joven sira” katak nia.

Nia mos husu ba Joven sira katak buat neebe mak UFD fasilita labele para iha fatin deit maibe fahe tutan ba joven sira nunee bele kontribui fali ba munisipiu liu husi kompete iha fatin serbisu sira no bele kria mos serbisu ba sira nia aan liu husi abilidade neebe mak hetan sira hetan.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here