UFD Kontinua Oferese Formasaun Ba Joven

Diretora Asosiasaun Unidade Feto ba Desenvolvimentu (UFD) Bendita de Jesus Amaral. (Foto: STL/Emerenciana Pinto)

BAUCAU, STLNEWS.co – Unidade Feto ba Desenvolvimentu (UFD) Munisipiu Baucau, kontinua oferese formasaun iha area oin-oin, ba joven sira iha Munisipiu Baucau.

Informasaun nee hatoo husi, Diretora Asosiasaun Unidade Feto ba Desenvolvimentu (UFD) Bendita de Jesus Amaral via telefone ba STL iha Kuarta (20/01/2021).

Bendita de Jesus Amaral hatete, loke formasaun fo kapasitasaun ba maluk joven sira iha Munisipiu Baucau laran, atu aumenta joven sira nia kuinesementu no esperensia iha area oin-oin.

“Foka liu ba area neebe fornese ona ba sira, fo formasaun hamutuk area neen, atu nunee joven sira bele asesu ba iha kampu trabailho iha futuru, i nunee mos joven sira bele ona loke kampu servisu ba sira nia aan rasik i bele mos oferese ba sira nia maluk joven sira seluk.” dehan Diretora UFD.

Diretora nee hatete, sentru formasaun UFD hahu loke ona premeiru faze no segundo faze, iha premeira faze joven sira rejistu hamutuk ualu nulu resin neen (86), maibe joven barak la tuir kursu, hela deit haat nulu resin ualu (48), finalidae hamutuk rua nulu resin neen (26), primeira faze materia hanesan joven sira aprende mak jornalismu, administrasaun, ho lingua portuguesa.

Bendita hatete, iha segundu faze total formandu hamutuk hitu nulu resin ualu (78) no formadu konsege remata hotu sira nia formasaun, no sira neebe simu uluk ona sertifikadu total hamutuk neen nulu resin neen (66) mai husi area tolu mak hanesan, lingua portugues, lingua ingles no komputador.

Nia hateten, sentru formasaun nee loke iha tinan 2018, no hahu loke rejistrasaun foun iha tinan 2019 ate agora.

“Sentru formasaun ida nee loke ona ba faze primeiru segundu. Ba faze primeiru area haat deit, ba faze segundu aumenta mak komputador ho leadership. Hamutuk area neen, ba fali terseiru faze agora dadaun halo hela rekrutamentu.” dehan Bendita.

Iha oportunidade ida nee, nia husu ba maluk joven sira iha munisipiu Baucau atu involve aan iha area formasaun oin-oin, nunee aumenta kapasidade no esperensia hodi prepara aan ho diak, atu kompete iha kampu trabalho.*

Reportajen: Est.To
Editor: Ekipa STL

LEAVE A REPLY

Please enter your comment!
Please enter your name here