Uma Kain 183 Nafatin Tutur Masa Buka Bee

DILI, STLNEWS.co – Uma kain 183 iha Suku Daudo, Postu Administrativu Kailaco, Munisipiu Bobonaro, too agora sei nafatin tutur masa hodi buka bee moos, hodi uza ba nesesidade loron-loron.

Tuir Xefe Suku Daudo, Antonino Maria Soares katak, tinan barak ona mak komunidade sira hotu iha Suku Daudo sei nafatin tutur masa hodi ba buka bee.

“Iha Suku Daudo ami iha uma kain hamutuk 183 mak too agora sei nafatin tutur masa hodi ba kuru bee ho distansia neebe dook, maski iha kompanhia balun mai survei ona fatin atu dada bee, maibe too agora seidauk,” dehan nia ba STL liu husi telefone, Domingu (10/12/2023).

Nia konta, bee dook husi komunidade sira nia uma, tanba nee tenki tutur masa ba kuru bee neebe ho distansia dook, laos ema boot hanesan inan ka aman sira deit, maibe tenke obriga mos oan sira neebe ho idade kiik tenki tutur hotu masa hodi ba kuru bee, tanba deit nesesidade familia nian hodi uza ba tein, haris ba eskola nomos sira seluk.

Nia tenik, nudar autoridade lokal neebe foin eleitu sai hanesan liman ain estadu nian, neebe besik liu ba komunidade sira sei buka solusaun ba problema bee mos neebe durante tinan barak ona populasaun sira iha Suku Daudu nee enfrenta.

(dom)

LEAVE A REPLY

Please enter your comment!
Please enter your name here