Uma Pas Baucau Preparadu Simu Kliente

Domingas Tilman hanesan konsileira ba Uma Pas Baucau hatete, staff ho ofisial sira iha Uma Pas iha mentalidade no fiziku neebe diak atu simu kliente sira neebe presiza apoiu husi Uma Pas. (Foto: STL/Veronica Varela)

BAUCAU, STLNEWS.co – Domingas Tilman hanesan konsileira ba Uma Pas Baucau hatete, staff ho ofisial sira iha Uma Pas iha mentalidade no fiziku neebe diak atu simu kliente sira neebe presiza apoiu husi Uma Pas.

“Uma Pas hahu halo atendementu nee iha 2008, iha 2015 ami hahu halo lansamentu Uma Pas sai NGO Nasional,” lia hirak nee hatoo husi konsileira Domingas Tilman ba STL iha nia knaar fatin Benfica, Kota Baru, Baucau, Segunda (08/02/2021).

Nia dehan, objetivu sira desidi hari Uma Pas nee iha tinan 2008 ho hanoin ida katak, liu husi uma mahon (Uma Pas), sira bele fo atendementu ba feto ho labarik no violensia bazeia ba jeneru neebe prrsiza tebes apoiu.

“Objetivu fundamentu hakarak harii Uma Pas nee mak, oinsa atu fo atendementu neebe haree liu ba feto ho labarik no violensia bazeia ba jeneru, tamba bainhira sira hasoru problema, otomatikamente sira trauma i dala ruma sira la iha fatin atu bele hela, nunee Uma Pas hanesan uma mahon ida ba sira hodi hela provizoriu, atu bele asegura sira husi sira nia problema,” dehan nia.

Nia haktuir, wainhira kliente sira nia trauma lakon ona, bele kolabora ho polisia, advogado sira halo aprosimasaun ho familia sira oinsa bele reintrega fila fali ba sira nia familia, mesmu ke prosesu justisa nee lao hela, sira tenke fila fali ba familia.

“Uma Pas halao servisu durante 24 oras nia laran, tanba nee atu dehan deit katak, staff no ofisial sira neebe servisu iha nee, sira iha ona mentalidade neebe diak, tamba kada loron sira atende kliente sira oinsa atu halo bimbingan konseling ba kolega sira neebe mai hela iha Uma Pas, no ami konsidera sira hanesan ami nia klienti, ofisial sira neebe halo atendementu ba kliente sira iha mentalidade no fiziku neebe mak diak no prontu simu kolega,” hatete konsileiru nee.

Nia hatete, kliente hirak neebe mai iha Uma Pas nee, ofisial sira seidauk bele halo konseling ba kliente sira, maibe ofisial sira tenke akompana lai kliente sira nia kondisaun no problema neebe nia hetan, nunee fasil ba ofisial sira atu bele halo atendementu.

“Uma Pas nia funsaun ida mak akompana kliente hodi hare liu ba kliente nia psikolojia saida mak kliente enfrenta, entaun ofisal sira koko atu hatene no anima kliente sira, hafoin ida nee kuandu tama ona loron tolu antes ba iha bimbingan konseling, ofisial sira hare katak kliente nia fizika nee prontu ona ga lae, atu halo atividade ga lae, se sira la prontu la bele obriga, maibe kuandu hare ba kliente toman ona ho staff sira no livre ona husi trauma foin mak ita fasilita sira hanesan suku, tein dala ruma mos halo dosi dala ruma halo paun hanesan nee,” hatete nia.

Nia hatete, atu halo atendementu iha area sira neebe ohin nia mensiona, Uma Pas halo rotasaun ba ofisial nain rua hodi troka malu atu akompana kliente sira, ida nee laos hanesan atividade neebe dehan tenki ser maibe ida nee hanesan atividade neebe mak koko suporta, hanesan konseling pratika neebe sira hetan atividade sira nee hanesan atividade konseling nia.

“Ita iha ema nain sanulu resin rua (12), kompostu husi, diretora, ofisial center, konsileiru, driver, no seguransa no oras nee dadaun ita iha ona staff nain haat (4), mak hetan ona sertifikadu hodi halo atendementu ba klienti sira iha uma mahon, nain haat neebe hetan ona sertifikadu nee sira laos psikiater ida, maibe sira iha esperensia ida konaba oinsa bele fo atendementu ba hamenus ema nia trauma no ema nia tauk,” akresenta nia.

Nia akresenta liutan, total kliente neebe simu ona konseling iha Uma Pas hamutuk Atus Neen Sanulu Resin Rua (612), husi konsileira sira iha Uma Pas i sira rekoperadu hotu ona.

“Bainhira halo atendementu ba kliente sira, Uma Pas Baucau la servisu mesak nunee Uma Pas Baucau koopera mos ho uma mahon sira seluk iha Timor laran tomak, oras nee dadaun ita iha uma mahon sia neebe pronto atu apoiu Uma Pas durante 24 oras nia laran hodi atende ita nia kliente sira,” tenik nia.*

Reportajen: ESTVE
Editor: Crisogono Magalhães

LEAVE A REPLY

Please enter your comment!
Please enter your name here