DILI, STLNEWS.co – Vitima rai halai uma kain 59 iha Zulo Knua, Suku Zulo, Postu Administrativu Zumalai, Munisipiu Kovalima, muda ona husi sentru evakuasaun eskola tekvo Zumalai ba fali sira nia knua Zulo, maibe sira idak-idak halo baraka, toba iha lona okos, seidauk asesu eletrisidade, sunu deit lilin.
“Ita nia vitima sira agora daudaun fila hikas ona ba sira nia knua Zulo, maibe sira halo baraka dook husi sira nia hela fatin, tanba ho dezastre naturais neebe akontese hau nian komunidade barak lakon sira nia uma, inklui hau nia uma lisan rasik estragus total, agora daudaun ita nia vitima sira provizoriu toba iha lona okos,” dehan Xefi Suku Zulo, Postu Administrativu Zumalai, Munisipiu Kovalima, Joao Lopes de Carvalho ba STL liu husi telefone, Sabadu nee (08/07/2023).
Joao dehan, horiseik Sekretariu Estadu Protesaun Sivil husi nasional mai vizita vitima sira nee iha Zulo Knua, tanba vitima uma kain 59 daudaun nee provizoriu sei toba iha lona okos, kalan sira sunu deit lilin, tanba momentu rai halai nee besi riin eletrisidade mos monu hotu, inklui vitima sira labele asesu eletrisidade inklui bee moos, no sira asesu deit bee posu.
“Ita servisu hamutuk ho Diresaun Protesaun Sivil Munisipiu Kovalima, Postu Saude Zumalai inklui Cruz Vermelha, agora daudaun fahe ona aimoruk ba vitima sira, apoiu emerjensia fos, ikan lata, rinsu, sabaun no apoiu seluk tan, nee vitima sira simu dezde hori bainrua, nunee horiseik mak tula sira ba fali Zulo Knua,” nia dehan.
(jac)
