DILI, STLNEWS.co – Vitima rai halai iha Zulo Knua, Suku Zulo, Postu Administrativu Zumalai, Munisipiu Kovalima, sei kontinua hela iha lona okos, atu muda ba bairu foun maibe seidauk loke estrada hodi tula sira nian material rekuperasaun.
Lia hirak nee hatoo husi Xefi Suku Zulo, Postu Administrativu Zumalai, Munisipiu Covalima, Joao Lopes de Carvalho, husi Munisipiu Covalima ba STL liu husi telefone, Tersa nee (25/07/2023).
“Ita nian vitima hamutuk uma kain 57, nee too agora sei kontinua hela nafatin iha lona okos, maski simu ona material rekuperasaun hanesan besi, kalen, sementi, atu tula sasan hirak nee ba bairu foun maibe estrada atu ba fatin refere seidauk loke ba ita nian komunidade sira, entaun horiseik kalan udan boot nee, ita nian vitima sira nee toba iha udan laran, tanba atu muda toba iha neebe,” nia esplika.
Joao dehan, maski kondisaun estrada neebe estragus husi rai halai nee normaliza tiha ona, no ita nian transporte publiku no privadu hahu halo movimentu iha fatin refere, agora atu tula vitima sira nia sasan ba bairo foun para sira konstrui hikas sira nian uma, maibe dalan atu asesu ba too neeba seidauk loke.
“Hahu iha loron 02 fulan nee, ita nian komunidade sira la asesu eletrisidade inklui bee moos, tanba nee kalan ita nian komunidade sira tenki sunu deit lilin, tanba besi riin eletrisidade neebe monu, too agora seidauk hadia, oinsa mak ita nian komunidade sira nee bele asesu ba eletrisidade iha fatin refere,” nia afirma.
Nia dehan, bainhira bee torneira neebe dada husi Lepo mai iha Zulo Knua nee la sai, komunidade sira tenki uza bee posu neebe mak antes nee sira uza tiha ona, tanba momentu rai halai nee pipa balun hetan estragus, ho ida nee komunidade Zulo Knua labele asesu bee moos no eletrisidade.
Nunee mos, Januario Braganca hanesan komunidade Suku Zulo dehan, too agora komunidade Zulo Knua seidauk asesu eletrisidade, tanba kauza husi rai halai halo besi riin eletridade monu, maibe too ohin loron seidauk hadia.
“Ita bele dehan tristi, maibe ida nee kompetensia husi orgaun kompetente para bele haree asuntu nee, se lae ami labele asesu eletrisidade no bee moos,” nia komenta.
(jac)
