DILI, STLNEWS.co – Administrador Postu Uatolari iha 3 Abril foin lalais nee halo enkontru ho xefi suku sira, lider partidu, arte marsiais no xefi juventude suku, para bele asegura kampanha eleitoral too iha rezultadu kontajen de votus.
Lia hirak nee hatoo husi Administrador Interinu Postu Uatalari, Thomas Soares da Silva ba STL iha nia knaar fatin Postu Uatolari, Kinta nee (13/4/2023).
“Iha dia 3 Abril, hau halo enkontru ho xefi suku nain 6, xefi juventude suku, partidu politiku, responsavel arte marsiais, hodi asegura kampanha neebe atu lao iha eleisaun parlamentar too kontajen de votus, nee hau halo tiha ona enkontru ho hau nia xefi suku sira,” dehan nia.
Nia informa, xefi suku sira hatete, sira prontu atu asegura kampanha, eleisaun too kontajen de votus.
“Hanesan autoriedade postu hau ho xefi suku sira prontu asegura kampanha eleitoral too rezultadu kontajen de votus,” hatete Thomas.
Nai tenik, bainhira akontese dezentendimentu iha kampanha no eleisaun parlamentar 2023, mak mosu dezentendimentu sira prontu atu responde karik mosu.
Iha fatin hanesan, Xefi Suku Uaitame afirma, hanesan autoriedade suku, sira hamutuk ho administrador postu, sira halao ona enkontru nivel postu ninia, iha neebe administrador fo ona orientasaun ba ami autoriedade hotu-hotu no juventude husi suku 6 inklui partidu politiku neebe ezisti iha kada suku 6.
“Ami halao ona sosializasaun nomos enkontru jeral, aleinde nee ami fo avizu kada suku idak-idak liu husi ami autoriedade lokal ba juventude nomos komunidade hotu-hotu, para bainhira ita ezerse ita nia direitu iha festa demokrasia, importante mak ita tenki kria unidade, estabilidade, pas ho dame,” hatete nia.
Nia relata, bainhira iha tempu kampanha no eleisaun parlamentar mak iha pesoal balun tenta atu estraga, nudar autoriedade sira kontaktu direta kedas ba parte seguransa hodi mai halo atuasaun.
Entretantu, Xefi Suku Matahoi haktuir, ema hotu-hotu hatene katak eleisaun no kampanha besik daudaun ona, hanesan autoriedade lokal iha Suku Matahoi nian, informa ona ba komunidade sira neebe atu partisipa iha kampanha, bainhira ba partisipa kampanha tenki lao tuir kampanha nian.
“Konaba kampanha eleitoral no eleisaun, hau fo avizu ona ba hau nia komunidade sira iha Suku Matahoi liu husi Xefi Aldeia sira atu esplika ba juventude no inan aman sira, bainhira ba partisipa kampanha karik lao tuir regras kampanha nian, labele lao ses husi regras kampanha nia,” hatete Xefe Suku Matahoi.
Xefi Suku haktuir, antes nee Munisipiu Vikeke, Posto Uatolari ema barak dehan fatin risku ba konflitu iha tempu kampanha no eleisaun.
(cri)
