DILI, STLNEWS.co – 04 Setembru loron importante ba Timor Leste hodi halo reflesaun ba rezultadu konsulta popular, tanba husi rezultadu nee povu kore aan husi terus durante tinan 24 nia laran.
Kestaun nee hatoo husi Ministru Asuntu Kombatentes Libertasaun Nasional, Gil da Costa Monteiro “Oan Soru” ba jornalista iha nia knaar fatin Komoro, Segunda (04/09/2023).
Nia hatete, loron 4 fulan Setembru 1999, loron neebe importante ba Timor Leste, hodi rona rezultadu konsulta popular, no iha loron importante nee Ministru mos hatoo parabens ba povu TL tomak, tanba iha momentu neeba ho desizaun povu hili ba independensia.
“Ohin ami halo deit konferensia imprensa hodi fo parabens ba povu tomak, ba refleksaun rejultadu konsulta popular tinan 24, neebe halo tinan ohin, neebe ami aproveita ohin hodi hatoo parabens ba povu tomak,” dehan nia.
Liu husi konferensia imprensa Ministru hatete, lori ministeriu nia naran no Konsellu Kombatentes Libertasaun Nasional hatoo votus parabens ba povu tomak neebe ohin halo ona tinan 24, no povu nia terus mos tinan 24 rona mos rejultadu konsulta popular hodi fo sai ba povu Timor Leste manan nia independensia neebe povu terus iha tinan 24 nia laran, no aseita nia familia mate iha 24 nia laran hodi sosa indepedensia liu husi ema Timor oan, ba forma iha urna iha teritoriu tomak hodi fo sira nia votus.
Nia afirma, maske povu hatene katak sira nia votus determina sira nia mate maibe povu ho voluntariu no ho vontade oferese sira nia mate ba libertasaun TL tuir heroi sira nia mehi, ho ida nee mak ho Ministeriu Veteranus nia naran hatoo parabens ba povu tomak.
“Loron 4 Setembru loron ohin ita boot sira rona rejultadu, povu TL tanis tanba kontente tanba terus iha tinan 24 nia laran maibe ikus manan, no balun mos triste no tanis tanba buat neebe sira hakarak sira la konsege. Biar nunee ohin ita halo refleksaun ba tinan 24 depois rejultadu konsulta popular ba sofrementu povu Timor Leste nian,” katak nia.
Ministru mos hatoo agradese ba sidadaun neebe husik ona Timor Leste ba nasaun vizinu Indonesia, no agradese ba sira tanba iha mundu tomak laiha nasaun ida mak laiha konflitu bainhira hetan indepedensia.
Xefi Estadu Maior Jeral FALINTIL Forsa defeza Timor Leste F- FDTL, Tenente Jeneral Domingos Falur Rate-Laek hatete, 04 Setembru mak loron ida neebe povu tomak simu ho kontente no hamnasa.
“Loron 4 Setembru komesa anunsia, ita hotu-hotu komesa kontente no hamnasa. Ita hotu haklalak, kontente, alegria tanba ita manan depois mosu tanis ida, haklalak ida tristeza nian, tanba komesa militar Indonezia oho ita neebe ita nia loron mak 4 Setembru ida nee ita valoriza, ita hahi, ita hanai ita nia eroi, martires sira neebe espesial mate iha loron 4 Setembru mai oin, depois anunsia rezultadu nee,” katak nia.
Xefi Estadu F-FDTL hatete, asuwain, sira nia ran ho isin sira hodi fase rai ida nee sai tiha fali adubu diak ba rai Timor Lorosae, neebe ema hotu luta hamutuk.
(eme)
