DILI, STLNEWS.co – Ministeriu Solidariedade Sosial no Inkluzaun (MSSI) sei halo pagamentu iha loron 14 fulan Agostu 2023, ba benefisiariu idozu hamutuk 99.564.
Informasaun nee hatoo husi Ministra Sosial, Veronica das Dores hatete, Ministeriu Solidariedade Sosial no Inkluzaun ohin anunsia ba publik katak, pagamentu pensaun sosial ba ferik no katuas no ema ho defisiensia, implementa simultaneamente iha munisipiu hotu-hotu iha teritoriu tomak, iha loron 14 fulan Agostu 2023.
Nia afirma, ba poupansa Banku Mandiri, BRI no BNU sira, bele halo levantamentu liu husi konta bankaria. Entretantu sira neebe seidauk iha konta bankaria, pagamentu nee sei selu direita ba benefisiariu sira.
Nia dehan, tuir dekretu lei Nu.53/2022 afirma, pensaun sosial ba ferik no katuas no maluk ho defisiensia sira, sei hetan pagamentu ho montante US$ 57 kada ema ba kada fulan. No agora halo pagamentu faze primeiru nian, ba fulan 6 uluk.
“Total benefisiariu sira hamutuk 99.564 mak benefisia husi pensaun nee, husi Munisipiu 12 inklui RAEOA. Pagamentu nee halao kada fulan 6 dala ida, ba tinan nee. Pagamentu premeira faze tuir lo-loos akontese iha Julhu 2023, maibe foin bele realiza iha Agostu 2023, iha loron 14 fulan Agostu 2023, tanba sei halo reajustamentu dadus benefisiariu ba tinan ida nee nian,” dehan nia liu husi konferensia imprensa, Kuarta nee (09/08/2023) salaun MSSI Kaikoli.
Nia haktuir, MSSI simu tiha ona korespondensia husi BNCTL hodi loke pagamentu pensaun sosial ba ferik no katuas no ema ho defisiensia, iha loron 14 Agostu 2023 iha sede suku sira iha munisipiu hotu.
Prosesu nee sei hetan asistensia no apoiu masimu husi Instituisaun Nasional Seguransa Sosial MSSI.
Aleinde nee, Observador Politika Universidade Nasional Timor Lorosae (UNTL), Felisberto de Carvalho hatete, governu mos tenki croos chek dadus balun, hanesan ema neebe mate tiha ona maibe simu nafatin.
No balun sei iha falsafikasaun de idade, idozu balun seidauk too idade 60 simu tiha ona subsidiu.
(nat)
