3 Marsu Loron Veteranus, PR Hatoo Mensajen Ba Veteranus Sira

Prezidente Republika (PR), Francisco Guterres Lú Olo. (Foto: Media PR)

DILI, STLNEWS.co – Loron 3 fulan Marsu feriadu nasional tanba komemora loron veteranus sira nia, iha loron nee Prezidente Republika Francisco Guterres Lú Olo, hatoo mensajen ba luta nain sira.

“Maluk kombatentes libertasaun nasional faluk no oan kiak sira povu Timor-Leste tomak, ohin loron feriadu nasional ida tanba iha signifikadu espesial tebes iha ita-nia istoria luta, atu bele mos afirma-an nuudar povu no nasaun.” hatete PR Lú Olo liu husi komunikadu neebe STL asesu husi Media PR, Kuarta lokraik (03/03/2021).

PR hatete tinan haat nulu liu ba, iha 3 Marsu 1981, tuir rejistu istoriku iha dokumentu oioin, kuadru superior FRETILIN sobrevivente sira hamutuk ho funu-nain barani, halao konferensia nasional iha Maubai/Viqueque.

Konferensia nee deside hatuur estrutura foun, Conselho Revolucionario da Resistênsia Nacional (CRRN), hili responsavel foun hodi kaer fali erois no martir sira nia knaar no define estrategia foun ba luta libertasaun nasional.

Tanba ninia importansia istorika as tebes mak loron 3 Marsu konsagra ona, nuudar loron veteranus sira-nian, liu husi Lei n.° 3/2016.

“La iha serimonia ofisial organiza husi estadu Timor-Leste maibe ita hotu, iha uma ka iha fatin neebe deit, labele haluha hahii ita-nia martir no eroi sira iha loron ohin. Keta haluha katak, ohin loron, ita moris ho liberdade tomak tanba ita-nia kombatentes libertasaun nasional, iha rai laran, fo-an too mate, terus iha kadeia no simu sakrifísiu oioin no, iha rai-liur, Timoroan barak ho espíritu no mehi hanesan, buka hetan apoiu husi komunidade internasional ba ita-nia direitu sira, nuudar povu ho identidade rasik.” katak PR.

Haree ba períodu husi 1975 too 1999 akontese violensia, tortura, pratika jenosídiu no etnosídiu husi forsa okupasionista sira. Maibe, iha períodu hanesan, hametin liután brani, determinasaun, valores no prinsípius.

“Ita-nia espíritu koletivu hanoin malu, tulun malu, fó-liman ba malu, la haree ba mane ka feto, ferik ka katuas, la haree ba rasa, etnia, relijiaun ka mai hosi reinu neebe deit. Ohin iha tempu ukun-an, ita presiza kaer nafatin espíritu luta nian atu bele lori dezenvolvimentu ba oin. Dezenvolvimentu ida neebe hothotu iha direitu ba hela iha uma desente ida, ho bee, eletrisidade no hahan baziku, direitu ba saude no edukasaun.” katak nia.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here