4 Setembru RNDJK Halao Asaun Pasifiku Hasoru PR

Tuir kalendariu fiksu, Rezistensia Nasional Defende Justisa i Konstituisaun (RNDJK) iha loron 4 fulan Setembru 2020 maizumenus tuku 09:00 dader, RNDJK sei hamrik hodi halo asaun pasifiku hasoru Prezidente Republika Francisco Gutteres Lú Olo. (Photo: STL News/Efizenia da Costa)

DILI, STLNEWS.co – Tuir kalendariu fiksu, Rezistensia Nasional Defende Justisa i Konstituisaun (RNDJK) iha loron 4 fulan Setembru 2020 maizumenus tuku 09:00 dader, RNDJK sei hamrik hodi halo asaun pasifiku hasoru Prezidente Republika Francisco Gutteres Lú Olo.

Portavoz RNDJK, Angela Freitas hateten, hakarak alerta ba povu iha teritoriu tomak katak, iha dia 4 Setembru sei iha asaun pasifiku ne’ebé sei hola parte husi povu munisipiu 13. Nune’e mos durante asaun pasifiku ne’e lao fatin konsentra massa iha eis kampu 744 Bekora ho Tasitolu.

“RNDJK sei halo asaun pasifiku hasoru PR Lú Olo tanba bazeia ba situasaun ne’ebé grave. Tanba violasaun konstituisaun ne’ebé iha ameasa mos ba sidadaun sira atu partisipa maximu ba partisipasaun konstrusaun de estadu,” katak Angela ba jornalista sira liu husi konferensia imprensa iha Salaun Konferensia RNDJK, Bairru Formosa Dili, Kuarta (25/8/2020).

Nia dehan, RNDJK hakarak hato’o ba povu tomak katak, hanesan sidadaun ita hotu iha responsibilidade atu defende konstituisaun, ne’ebé defende direitu sidadaun tomak, politikamente, ekonomikamente, ekonomia kultural, nomos sosial.

Ladefende konstituisaun hatudu inkapasisdade ba internasionalmente katak povu rasik lakomprende saida mak sira hasoru iha sira nia rai rasik.

Tanba rai ida ne’e ema hotu nia responsabilidade garante sidadaun, hodi hamutuk hadia fila fali ne’ebé ohin loron ukun nain sira sama. Oinsa mak atu harii fila fali kontituisaun no hatu’ur fila fali konstituisaun iha nia fatin presiza konsiesia sidadaun tomak atu hamutuk unidus atu defende nia soberania.

Nasaun ne’e nia soberania so ita defende, enkuantu ita defende ita nia konstituisaun tanba konstituisaun matadalan hodi proteje soberania rasik. Tanba ne’e labele monu ba grupus ne’ebé laiha responsabilidade politiza situasaun no transmite informasaun ne’ebé laloos, atu prejudika partisipasaun movimentu sidadaun sira atu expressa sira nia hanoin konaba situasaun ne’ebé mak hasoru durante ne’e.

Reportajen: Efizenia da Costa

Editor: Ekipa STL

LEAVE A REPLY

Please enter your comment!
Please enter your name here