DILI, STLNEWS.co – Aban loron 30 Marsu 2023 bis Damri sei halo operasaun dahuluk husi Kupang mai Timor Leste (TL), no husi TL ba Kupang.
“Aban ita hahu halo lansamentu ba bis sira husi Indonezia mai TL, nunee mos husi TL ba Kupang. Bis sira neebe sei halo operasaun ba mai nee mak naran tama hotu ona iha memorandum laran, no aban dia 30 Marsu ita sei halo lansamentu dahuluk, ka viajen primeiru husi Dili ba Kupang no husi Kupang mai TL,” kestaun nee fo sai husi Ministru Transporte Komunikasaun, Jose Agostinho ba STL Kuarta nee (29/03/2023) liu husi telefone.
Tuir Ministru nee katak, haree ba infraestrutura seidauk preparadu, tanba nee fatin destinasaun temporaria ba bis sira nee mak husi Motain mai iha Maubara, Tasi Tolu nomos iha Sentru Kovensaun Dili.
“Hau hanoin ita sei kria kondisaun neebe diak iha fatin sira neebe mak temi ona nee, atu nunee bele fasilita diak liu tan bis sira neebe tama mai, operasaun bis sira nee investimentu ida husi ita nia emprezariu feto sira, tanba nee bis sira nee sei halo operasaun iha loron 30 fulan ida nee,” dehan ministru nee.
(mad)
