DILI, STLNEWS.co – Aban loron Tersa (12/04/2022) hanesan loron ikus ba kampanha Kandidatura Prezidente Republika Jose Ramos Horta (JRH) nian, tanba nee husu militante, simpatizante no apoiantes sira atu mai tuir regras neebe iha.
“Hau husu ba militante, simpatizante no apoiantes sira atu lao tuir regras tranzitu neebe iha, karik ho motorizada tenki uza kapasete no kria nafatin pas no estabilidade durante kampanha nee lao,” dehan Sekretariu Jeral Partidu CNRT, Francisco Kalbuadi Lay, liu husi konferensia imprensa, Segunda nee (11/04/2022 ) iha sede Nasional Partidu CNRT Bairo Grilos, Dili.
Nia afirma liu tan, kampanha prezidensial nee hahu iha loron 2 fulan Abril, agora atu remata ona, tanba liga ho loron boot paskua, tanba nee tenki determina ona kampanha husi kandidatura Prezidente JRH nian iha loron 12 fulan Abril tinan 2022 iha Tasi Tolu, tan nee husu ba apoiantes sira, militante tomak, no hotu – hotu inklui movimentu tomak atu lao tuir regras, hanesan respeita sinais tranzitu, lei estrada, labele monu ba provokasaun ruma hodi disturbo neebe prejudika estabilidade iha kapital Dili.
Kampanha nee sei hahu iha oras tuku 9:00 dader too oras tuku 6:00 loraik, tanba nee Kandidatura Prezidente Republika José Ramos ho Prezidente Partidu CNRT, Kay Rala Xanana Gusmão, sei hatoo sira nia komisiu iha oras 14:00 too 18:00, tan nee husu ba militante sira atu kria ambiente neebe disiplina, pas no establidade durante komisiu nee lao.
(mad)
