Aban, Mate Isin Avo Ana Maria Fernandes de Vasconcelos Haloot Iha Semiteriu Kakaulidun

DILI, STLNEWS.co – Mate isin matebian Ana Maria Fernandes de Vasconcelos sei haloot iha Semiteriu Kakaulidun, Suku Bairo Pite, Postu Administrativu Dom Aleixo, Munisipiu Dili, Domingu (05/09/2021).   

Tuir informasaun neebe diariu nee rekolla iha mate uma katak, prosesu funeral mate isin matebian Avo Ana hahu ho misa tuku 11:00 OTL, neebe sei prezide husi xefe sarani Hosana, Dili, Rev. Moises A. da Silva no Xefe Sinodo Igreja Protestante iha Timor Leste (IPTL) Rev. Domingos Alves, S. Si.Teol.

Avo Ana hakotu nia iis iha Hospital Nasional Guido Valadares (HNG) Dili,  Kuarta kalan (1/9/2021) tuku 23.50 WTL. Avo Ana hakotu iis ho idade 107.

To’o loron Sabadu (04/09/2021) situasaun tristeza sei hafalun familia boot Vasconcelos iha mate um. Familia, parentes, kolegas no amigus mai iha mate uma hodi hato’o sentimentu tristeza no sentidu kondolensia klean ba familia enlutada Avo Ana.

Matebian nia oan mane Francisco Maria de Vasconcelos (Atual Xefe Kasa Civil) foin to’o iha Dili, Sabadu (04/09/2021). Depois loron ualu (8) iha Illa Lirung, Distritu Talaud, Sulawesi Norte, Indonezia, tanba nia feen kaben  Eugenie Augusta Tatuluse mate iha  nia moris fatin, Lirung, loron 25 fulan Agostu tinan 2021. Mate isin matebian Eugenie Augusta Tatuluse hakoi iha loron 28 fulan Agostu tinan 2021.

Bainhira to’o iha nia rezidensia Aldeia 5 Outubru, Suku Bairo Pite, Francisco Maria de Vasconcelos ho laran triste no matan wen sulin, tanba haree nia inan toba ona iha kaisaun laran. Antes nia ba Lirung, Distritu Talaud, Sulawesi Norte, atu hakoi nia feen kaben Eugenie Augusta Tatuluse, nia inan sei moris ho kondisaun saudavel. Avo Ana mos sei akompana prosesu funeral nia feto foun Eugenie Augusta Tatuluse liu husi aplikasaun Zoom iha loron 28 fulan Agostu tinan 2021.

Liu husi nota neebe diariu nee asesu, Prezidente Repúblika (PR) Francisco Guterres ‘Lú Olo no funsionáriu tomak hato’o sentimentu triste ba família. “Prezidente Repúblika hato’o sentidu kondolénsia ba Xefe Kaza Sivil Francisco Maria Vasconcelos no família ne’ebé lakon inan doben guerilleira no edukadora ne’ebé hakotu iis iha loron 01 fulan Setembru tinan 2021 iha HNGV Dili,” hatete Prezidente Lu Olo liu husi nota nee.

Avo Ana Maria Fernandes de Vasconcelos moris iha Postu Administrativu Uatu-Carbau, Munisípiu Viqueque iha loron 15 fulan Abríl tinan 1914. Avo Ana nia laen kaben Pastor Vicente de Vasconcelos fila hikas ona ba Aman Maromak nia kadunan lalehan iha tinan hirak liu ba.

Husi kazamentu Avo Ana ho Vicente de Vasconcelos rezulta oan nain lima (5) kompostu husi, Maria Filomena de Vasconcelos, Joana Maria de Vasconcelos, Francisco Maria de Vasconcelos, Abrão de Vasconcelos no Maria da Graça de Vasconcelos.

Reportajem: Yulius Ora/Mikael Mali Mau

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 23 Setembru: Kazu Pozitivu 58, Rekuperadu 148 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu pozitivu iha ema nain 58, i kazu rekuperadu ohin loron 148 no obitu nain...

Vasinasaun Dalan Seguru, Normaliza Situasaun

DILI, STLNEWS.co – Vasinasaun mak dalan seguru hodi normaliza situasaun, no hasae imunidade forte atu prevene Covid-19. Kestaun nee haktuir husi Ministru Ensinu Superior Siensia...

Finalista ICS 292 Simu Graduasaun

DILI, STLNEWS.co – Institutu Ciencia Saude (ICS), ohin halao graduasaun ba finalista hamutuk 292, kompostu husi fakuldade 4 mak hanesan, Fakuldade Enfarmajen, Farmasia, Parteira...
%d bloggers like this: