Abril – Maiu Rekrutamentu Membru F-FDTL

Komandante das Falintil FDTL, Tenente Jeneral Lere Anan Timur halo enkontru ho Prezidente Republika iha Palasiu Prezidente Nicolau Lobato, Kuarta (24/03/2021). (Foto: Media PR)

DILI, STLNEWS.co – Rekrutamentu ba membru Falintil Forsa Defeza Timor Leste (F-FDTL), hahu iha fulan Abril no Maiu tinan nee.

Kestaun nee hatoo husi Komandante F-FDTL, Tenente Jeneral Lere Anan Timur ba jornalista bainhira remata hasoru malu ho Prezidente Republika Francisco Guterres Lú Olo iha Palasiu Prezidente, Bairru Pite, Kuarta (24/03/2021).

“Konaba situasaun forsa armadas nian, liu liu ba rekrutamentu, tanba Covid-19 nee governu labele kumpre nia planu. Neebe hau propoin ba sira liu liu rekrutamentu ba tinan ida nee, hau hakarak seisentus maibe tanba deit orsamentu, Covid-19, buat sira nee dala ruma redus ba trizentus, bele hahu iha fulan Abril ou Maiu,” tenik Komandante F-FDTL nee.

Tenente Jeneral Lere dehan, tuir nia planu nee atu halo rekrutamentu ba membru forsa armadas nee hamutuk 600, maibe tanba problema fardamentu no kilat entau sira rekruta 300 deit, no 300 nee nee garantidu ona iha ona fardamentu no kilat.

Nia hatutan, orsamentu ba rekrutamentu nee kolokadu tiha ona, nee orsamentu ba tinan 2020, maibe buat sira nee hotu dezisaun politika.*

Reportajen: Emerenciana Pinto
Editora: Domingas Gomes

LEAVE A REPLY

Please enter your comment!
Please enter your name here