DILI, STLNEWS.co – Administrasaun Munisipiu Dili estabelese ona ekipa taskforce atu hasae kobertura moras tuberkuloze (TB), no asegura pasiente sira hetan tratamentu kompletu, atu bele redus transmisaun moras nee.
Kestaun hatoo husi Prezidente Autoridade Munisipiu Dili, Guilhermina Filomena Saldanha hateten ba STL iha Administrasaun Munisipiu Dili Matadoru, Kinta (06/07/2023).
“Ita estabelese ona ekipa taskforce ida ho komposizaun mai husi Ministeriu Saude, Administrador Postu sira, Komando Polisia Munisipiu, veteranus, organizasaun sosiedade sivil, igreja no lider komunitaria atu hamutuk esforsu hasae kobertura detesaun kazu tuberkuloze no asegura pasiente sira hetan tratamentu kompletu, atu bele redus transmisaun moras, too tempu ida bele kombate moras nee,” nia hatete.
Nia dehan, moras TB hanesan moras endemiku iha Timor-Leste, neebe konsidera problema nasional saude pablika, tanba fo implikasaun boot ba povu nia moris no dezenvovimentu sosio ekonomia.
Nia informa, ekipa taskforce nee nudar forsa koletiva ida neebe sei halao knaar ho matenek, didikasaun umanu, responsabilidade, imparsialidade no integreidade onestu, hodi alkansa objetivu kombate moras TB iha Timor-Leste.
Iha parte seluk, Diretora Servisu Saude Munisipal Dili, Agustina Segurado hateten, atu redus transmisaun moras TB no hapara moras presiza asaun koletiva husi multisetorial, tanba nee ho ezistensia ekipa taskforce nee bele apoia saude halao asaun konkretu sira iha komunidade, atu bele deteta ema neebe hetan moras barak liu tan no halo tratamentu kompletu.
Nia dehan, tinan 2022, sira konsege halo deteksaun kazu foun hamutuk 200 resin, neebe pasiente sira nee tama hotu iha tratamentu programa nian. Nunee mos kuaze 93% pasiente TB hetan kura.
(jen)
