ADTL Apresia KM Aprova Ona Planu Asaun Nasional

DILI, STLNEWS.co – Grupu Organizasaun Asosiasaun Defisiensia Timor-Leste (ADTL), apresia ho reuniaun Konsellu Ministru neebe aprova ona planu asaun nasional defisiensia periodu ba tinan 2021 to’o 2030. 

Liafuan nee haktuir husi portavos Grupu ADTL, Rosalia Teresa Pereira ba jornalista sira, liu husi konferensia inprensa iha salaun ADTL Mascarinhas, Kuarta nee (13/10/2021).

Nia hatete, iha loron 6 fulan Outobru tinan 2021 governu liu husi  reuniaun Konsellu Ministru, aprova ona planu asaun nasional defisiensia ba periodu tinan 2021-2030.

“Ho aprovasaun dokumentu importante ida nee, ami husi organizasaun hirak neebe servisu no tau matan ba asuntu defisiensia iha TL, hakarak hato’o ami nia apresiasaun klean ba Primeiru Ministru, neebe lidera reuniaun Konsellu Ministru hodi aprova dokumentu importante ida nee,’’ katak nia.

Nia hatutan, ADTL hakarak rekomenda ba ministeriu no sekretariu estadu hirak neebe hola parte, atu inplementa planu asaun nasional, tenik nia.

Iha fatin hanesan, Diretor Ezekutivu ADTL Cesario da Silva konsidera planu nee, dokumentu esensial ida ba dezenvolvimentu nasional, tanba nee mak ADTL hakarak sita liu tan katak, presiza orsamentu atu aumenta ba planu asaun nasional nee rasik.*

Reportajen: EST/07

Editor: Domingas Gomes

LEAVE A REPLY

Please enter your comment!
Please enter your name here