Aeroportu Internasional Rota Sandalu Oecusse, Seidauk Hatama Reseita

Adjunta Prezidente Autoridade RAEOA, Leonia Monteiro. (Foto: STL/Alberto Menezes)

DILI, STLNEWS.co – Adjunta Prezidente Autoridade RAEOA Leonia Monteiro informa, Aeroportu Internasional Rota Sandalu Oecusse, ate ohin loron seidauk bele hatama reseita tanba seidauk halo investimentu ba aeroportu internasional refere.

“Aeroportu internasional iha Oecusse, ita atu kolia iha reseitas nee seidauk tanba konstrusaun foin hotu, no ita mos seidauk halo investimentu publiku ba iha aeroportu internasional nee,” dehan Adjunta Prezidente Autoridade RAEOA, Leonia Monteiro iha Edifisiu Minesteriu Finansas Aitarak-Laran, Dili, Segunda,(28/09/2020).

Adjunta Prezidente RAEOA nee afirma, dadaun nee planu ona hodi halo sertifikasaun internasional, nunee bele halo investimentu publiku ba aeroportu internasional nee.

“Ita planu atu halo, no iha ona konsiderasaun husi Primeiru Ministru para atu Ministeriu Obras Publikas no Minesteriu Transporte Komunikasaun bele hanoin ona konaba sertifikasaun, nunee bele halo investimentu publiku, atu ita bele hetan reseita husi aeroportu nee.” nia esplika.

Nunee nia dehan, maske seidauk iha reseita maibe manutensaun ba iha Aeroportu Internasional Rota de Sandalu nee dadaun kontinua lao nafatin, nunee bele mantein nia kualidade.

Entretantu Aeroportu Internasional Oecusse neebe nia konstrusaun hahu iha tinan 2015, no remata iha tinan 2018, inagura iha loron 18 Junhu 2019, ho nia kustu konstrusaun ba obra nee purvolta millaun $120 neebe konstrui husi empreza Wijaya Karya, Tbk (WIKA) hosi Indonezia, ho nia naruk pista metru 2.200, inklui ho nia fasilidade ho kualidade aeroportu internasional.

Reportajen: Alberto Menezes

Editor: Ekipa STL

LEAVE A REPLY

Please enter your comment!
Please enter your name here