Afonso Pinto: Nasaun Nee Sosa Ho Raan No Ruin

DILI, STLNEWS.co – Governu no povu Timor Leste, Sesta nee (12/11/2021) selebra loron nasional juventude no trajedia Santa Cruz ba dala XXX (30) (12 Novembru 1991 – 12 Novembru 2021) ho misa iha Igreja Santo Antonio Motael no kari ai-funan iha Semiteriu Santa Cruz, fatin akontesimentu trajedia 12 Novembru 1991.  

Afonso Pinto hanesan mate restu ida neebe iha momentu neeba hamutuk ho juventude barak, aten barani iha Santa Kruz hatete katak, momentu akontese trajedia Santa Cruz nee, nia mos iha laran, maibe nia sei kiik oan. Nia konsege subar an iha laran, no nia haree ho matan juventude barak mak mate iha tempu neeba, tanba hetan tiru husi militar Indonezia.

Afonso Pinto ho kódigu “Anin Fuik” konta katak, maske iha tempu neeba nia sei kiik oan, maibe nia sente mate nee mate duni. “Nasaun nee ita sosa ho raan no ruin,” dehan nia ba STL iha nia hela fatin, Suku Fatuhada, Postu Administrativu Dom Aleixo, Munisipiu Dili, Sesta nee (12/11/2021).

Ho selebrasaun trajedia Santa Kruz 12 Novembru ba dala XXX (30) nee, atu hanoin hikas juventude aten barani sira neebe fakar nia raan iha momentu neeba, sai hanesan espíritu ida ba foin sae sira atu hadia nasaun nee ba futuru. “Hau husu ba juventude foin sae sira atu hadia imi nia an no labele halo buat neebe la diak hodi estraga ita nia nasaun,” katak Afonso. Nia mos husu ba Komite 12 Novembru atu haree joven sira neebe sai vitima trajedia 12 Novembru 1991, atu hetan kondekorasaun husi estadu.

”Hau nia ezijénsia nee laos hau atu hetan osan ka kondekorasaun, tanba iha momentu neeba juventude sira halo asaun laos tanba hetan osan, maibe halo asaun atu hetan libertasaun ba rai ida nee,” tenik Afonso. 

Nia apela ba foin sae sira atu hadia nia an ho estuda no halo buat neebe diak ba nasaun, labele halo buat neebe estraga nasaun. “Futuru nasaun nee iha imi nia liman, no imi mak nain ba nasaun nee. Estuda makaas, tanba ho matenek mak bele hadia nasaun nee. Nasaun nee sosa ho raan no ruin, tanba husi tinan 1975 to’o 1999, ema atus ba atus mak mate ba rai ida nee,” dehan Afonso.

(mar)

LEAVE A REPLY

Please enter your comment!
Please enter your name here

NEWS UPDATE

Jornalista Iha Filipina Hetan Tiru, Suspeitu Sei Misteriu

DILI, STLNEWS.co – Jornalista ida mate hetan tiru iha Filipina loron Kuarta horiseik (08/12/2022), bazeia ba informasaun husi grupu advokasia fatin neeba. Nia mak Jesus...

Universidade Katolika TL Iha Lasu No Devosaun Boot

DILI, STLNEWS.co – Ohin governu no lider Igreja Katolika hamutuk ho Premeadu Nobel da Paz, Dr. Jose Ramos Horta halo inagurasaun abertura solene Universidade...

Mota Hafahe Estrada Terminal Tasi Tolu Ho Sidade Dili

DILI, STLNEWS.co - Oras nee dadaun estrada iha terminal Tasi Tolu nakfila ona ba mota, hodi hafahe ona Tasi Tolu ho sidade Dili. Tuir observasaun...