AHISAUN lha Programa Prioridade 3

Tinan ida nee, organizasaun AHISAUN iha programa perioridade tolu, hanesan edukasaun formal, non formal, nomos halo advokasia. (Foto: STL/Jacinta Sequeira)

DILI, STLNEWS.co – Tinan ida nee, organizasaun AHISAUN iha programa perioridade tolu, hanesan edukasaun formal, non formal, nomos halo advokasia.

Antoninho da Silva Soares hatete, programa edukasaun formal maka, atu formasaun ba ema ho defisiente sira, neebe sira akaba ona edukasaun formal, maibe sira seidauk iha edukasaun formal, entaun haruka sira bele tuir formasaun Ingles no komputador.

“Hau hanoin ami nian programa advokasia mak atu hasae ema nian konsiensia komunidade sira nian, atu nunee labele halo diskriminasaun ba ema ho defisiente sira nian, depois iha edukasaun formal nee mak oinsa mak haruka estudante sira ba eskola, nomos loke mos eskola formal, hanesan eskola sekundariu, tanba agora dadaun ami planu ba oin nee, ami atu loke eskola ba ema sira iha liur nee, atu bele tama, hanesan eskola ida iha Metinaro,” dehan Antoninho ba STL, iha edifisiu Ahisaun Fatuhada, Dili, Tersa (12/01/2021).

Nia dehan, sira sempre fahe informasaun, hanesan sira halo sosializasaun lori programa neebe mak sira rasik planu ona, ba komunidade sira katak, labele husik ema defisiente sira sulan ou abandona deit iha uma, maibe tenke fo oportunidade ba sira, atu nunee sira mos bele involve iha area edukasaun, no atividades seluk, neebe mak NGO ahisaun nian, nomos iha parte seluk.

“Hau hanoin ema defisiente sira mos iha direitu hanesan ho maluk sira neebe mak moris ho kondisaun la defisiente, ba tinan 2020 nee, ami produs ema defisiente nee hamutuk nain 15, neebe mak iha kursu komputador, iha edukasaun formal nain 20, neebe mak akaba eskola sekundariu,” tenik nia.

Nunee mos, Agostinho do Rego, hanesan programa manejer iha AHISAUN, dehan, atividades prinsipal neebe ma iha ahisaun iha, primeiru advokasia, segundu edukasaun formal no edukasaun non formal ninia, terseiru mak oinsa atu loke kampu servisu ba maluk defisiente sira, entaun sira loke mos eskola sekundariu tekniku informatika ida, neebe mak lokaliza iha area Metinaro ninia.

“Husi advokasia ami sempre tun ba iha sosiedade sira iha 13 Munisipiu, oinsa mak atu bele fahe informasaun ruma konaba diskriminasaun, atu nunee maluk defisiente sira neebe iha Munisipiu labele hetan diskriminasaun,” dehan nia.*

Reportajen: Jacinta Sequeira
Editora: Carme Ximenes

LEAVE A REPLY

Please enter your comment!
Please enter your name here