AJAR Diskorda Dekretu Lei nu 63/2020

Program officer Asia Justice and Rights (AJAR), Inocencio Xavier. (Foto: STL/Claudios de Jesus)

DILI, STLNEWS.co – Program Officer Asia Justice and Rights (AJAR) diskorda totalmente ho Dekretu Lei nu 63/2020, neebe koalia kona ba pagamentu extra ordinariu ba Orgaun Soberanu 4.

Program officer Asia Justice and Rights (AJAR), Inocencio Xavier hatete, sira diskorda totalmente dekretu lei 63/2020 neebe maka koalia kona ba salariu extra ordinariu, nee signifika governu fahe osan arbiru deit.

Tanba durante nee iha ona gaji 13, depois simu tan ida pagamentu extra ordinariu nee kona ba saida, iha situasaun Covid-19 halo ema kiak iha mundu. Prooblema inflasaun ba orsamntu, rendimentu mina rai lasae, reseitas domestika mos lalao, maibe governu sira foti osan fahe arbiru deit.

Tanba tuir nia katak, osan nee fahe deit ba estrutura governu hahu husi Presidente Republika (PR), ho nia funsionariu sira, Primeiru Ministru (PM) ho nia funsionariu sira, tantu Ministru sira no orgaun soberanu haat nee hetan hotu.

“Iha dekretu lei nee katak ema neebe vensimentu 5 mil ba leten maka lasimu, maibe hahu husi PR tuun to mai kraik simu, nee lainklui gaji 13.Tanba nee gasta osan, (malgastus) governu fo osan US$25 ba povu, maibe sira fahe osan boot, tanba nee ami diskorda totalmente ho lei nu 63/2020,” dehan Inocencio ba STL, iha nia knaar fatin Farol, Dili, Segunda (21/12/2020).

Inocencio afirma, hatutan uniku povu maka hetan deit pagamentu sesta bazika ho montante US$25 dolares nee, tanba nee tenke hanoin ho didiak
Relasiona ho dekretu lei nu 63/2020, oras nee dadaun sosiedade sivil prepara ona submisaun, atu hatoo ba PM katak sira diskorta ho dekretu lei nee.

Aban sosiedade sei hasoru Primeiru Ministru atu hapara dekretu lei nee, tanba ho razaun hasoru hela situasaun Covid ida neebe afeta hela ba rendimentu no situasaun neebe halo povu hotu kiak, maibe ajente estadu sira foti osan fahe ba malu nee lajustu, no ida nee maka konsidera korupsaun ilegl no violasaun.

Povu moris miseria hela, maibe ukun nain sira halo lei, hodi foti osan fahe ba malu, simu tiha gaji 13, maibe sei halo tan lei inventa hodi lejitima atu simu tan osan extra ordinariu, tanba nee sira husu atu invaliu tiha lei nee.

“Ami hanoin hela atu husu ba CAC, atu investiga no halo justifikasaun abstratu ba normas ida nee, neebe aban ami sei hasoru PM,” Inocencio salienta.*

Reportajen: Claudios de Jesus/Santina Castro
Editora: Carme Ximenes

LEAVE A REPLY

Please enter your comment!
Please enter your name here