AJAR Konsidera Viajen PR Ba India, Viola Konstituisaun

DILI, STLNEWS.co – Diretor Asia Justice And Rights (AJAR), Jose Luis De Oliveira hatete, viajen Prezidente Republika Jose Ramos Horta ba iha India nee viola konstituisaun, tanba viajen ona aviaun laran mak foin entrega karta ba iha Parlamentu Nasional, tuir lo-loos antes aranka entrega ona no presiza hetan autorizasaun husi parlamentu.

Kestaun nee hatoo husi Diretor Asia Justie And Rights (AJAR), Jose Luis De Oliveira ba STL iha nia knaar fatin Farol, Tersa (09/01/2024).

Nia dehan, tuir konstituisaun bainhira prezidente atu halo viajen ba rai liur tenki hetan uluk lisensa husi Parlamentu Nasional mak foin sai, laos sae ona iha aviaun leten mak foin envia karta ba, nee viola konstituisaun, ida nee estadu falhadu ona.

“Nee viola konstituisaun, tuir prosesual konstitusional nee prezidente molok atu halo viajen, prezidente submete uluk lai pedidu ba iha parlamentu, parlamentu tenki aseita, parlamentu enome do povu tenki aseita, tanba nia ba nee reprezenta estadu, estadu reprezenta povu nee, tanba nee tenki aseita uluk lai mak ba, laos nia sae uluk ona aviaun, iha aviaun leten mak parlamentu foin simu karta, nee viola konstituisaun, uluk nee maun sira dehan hatuur fali konstituisaun agora iha neebe, nee ladiak viola konstituisaun,” katak nia.

Nia hatete, durante nee mos Prezidente Republika koalia makaas katak ema hotu tenki hakruuk ba lei no lei mak aas liu, maibe ikus prezidente rasik mak viola.

Nia hatutan, presiza tau asuntu intrese estadu iha leten, se la tau intrese estadu iha leten mak Prezidente Republika mos sei viajen ba rai liur koalia tun sae deit, ida nee afeita ba dignidade nudar estadu, tanba nee mak tenki husu konsiensia.

(eme)

LEAVE A REPLY

Please enter your comment!
Please enter your name here