DILI, STLNEWS.co – Asosisaun Jornalista Timor-Leste (AJTL) husu governu foun liu-liu ba instituisaun relevante sira komprende didiak papel jornalista nian, no labele mosu tan diskriminasaun, tenki halo tratamentu hanesan ba jornalista hotu-hotu.
Kestaun nee hatoo husi Prezidente Asosiasaun Jornalista Timor Leste, Zevonia Vieira ba STL iha sede AJTL, Fatuhada, Dili, Tersa (27//2023).
“AJTL rasik hetan komplein barak husi jornalista sira neebe mak beat iha instituisaun publiku sira katak, hamosu diskriminasaun entre jornalista sira,” dehan nia.
Nia dehan, ida nee la diak, tenki halo tratamentu hanesan, tanba jornalista sira nia servisu hanesan hotu, laiha ida mak halo diak liu, maibe sira nia papel mak atu hetan informasaun nomos publika.
“Husu ba governasaun foun ida nee, iha instituisaun hotu-hotu tenki komprende papel jornalista nian tenki loke dalan no halo komunikasaun diak ho jornalista sira, atu nunee jornalista sira mos bele hetan informasaun sira husi ministru ka instituisaun relevante sira,” dehan nia.
Nia haktuir, labele halo diskriminasaun entre media no jornalista sira, tanba papel jornalista neebe mak servisu iha televizaun, radio, jornal no online hotu-hotu hanesan deit, publika informasaun neebe mak sira hetan husi institusaun sira nee.
Nia mos husu ba governasaun foun atu respeita papel jornalista nian, halo komunikasaun diak no halo tratamentu hanesan, nunee informasaun neebe jornalista fo sai mos bele responde ka bele publika duni informasaun neebe mak tuir instituisaun sira nia hakarak no labele halo tratamentu neebe mak la justu ba jornalista sira.
Enkuntu, nia informa atu se deit midia online, jornal, televizaun no radio ba tenki simu ho diak, halo tratamentu no komunikasaun diak, atu nunee jornalista mos senti katak sira hetan duni respeita husi instituisaun sira.
Iha sorin seluk, Prezidente Timor Leste Press Union, Candido Alves mos hatete, hanoin katak governu husi partidu ka grupu neebe deit mak atu kaer ukun ba rai ida nee, dezenvolve demokrasia dalan uniku mak jornalista tenki haburas no tenki harii.
“Nunee demokrasia nee bele buras ba beibeik iha ita nia rain, ita koalia konaba demokrasia, knaar jornalista, tanba jornalista mak bele hatoo anin no liberdade ba ema hotu,” dehan nia.
(mar)
