Alkatiri: FRETILIN Laos Ema Komunista

Sekretariu Jeral Partidu FRETILIN Mari Alkatiri hatete, membru FRETILIN hotu laos ema komunista, maibe ema FRETILIN mak fo valores ba prinsipiu povu maubere hodi luta ba ukun rasik aan. (Foto: Pajina Facebook Mari Alkatiri)

DILI, STLNEWS.co – Sekretariu Jeral Partidu FRETILIN Mari Alkatiri hatete, membru FRETILIN hotu laos ema komunista, maibe ema FRETILIN mak fo valores ba prinsipiu povu maubere hodi luta ba ukun rasik aan.

Nia hatutan nunee valor proklamasaun ba independensia 28 Novembru 1975 ho nia estratejiku rasik no FRETILIN mak hahu husi prosesu ida, hodi formula atu solusiona problema rai laran. Tanba nee membru FRETILIN sira hotu, sira laos ema komunista.

“Ami FRETILIN laos ema komunista, ami FRETILIN servisu ho povu iha tempu uluk kedas, laos foin mak ami servisu ho povu, nunee ami FRETILIN laos ema komunista, tanba povu mak sei sai bee ba ita nia ema sira,” dehan Alkatiri bainhira sai orador 1 iha seminariu Nasional ba loron proklamasaun independensia 28 Novembru 1975, iha Kampus IOB, Fomentu 2, Dili, Tersa (24/11/2020).

Eis Primeiru Ministru iha governu da-1 no da-7 nee dehan, objetivu husi proklamasaun atu povu bele hatene se mak lidere rai ida nee too hetan independensia, maibe FRETILIN hatete nee katak, programa ba proklamasaun independensia laos fasil, maibe difisil tebes bainhira servisu hamutuk ho povu maubere iha tempu luta ba rai ida nee.

Nia apela ba lideransa rejistensia hotu katak, rai doben Timor Leste hetan independensia, laos manan lori pregu, maibe manan lori kilat, dalabarak ema hotu haree Ramos Horta nia koalia iha publiku katak, povu mak manan rai ida lori pregu, laos lori kilat.

“Ita tenke hatene loloos prosesu luta ba ita nia ukun rasik aan ba rai ida nee, dalaruma lider rejistensia sira mak konta sala historia independensia Timor Leste nian,” afirma Alkatiri.

Alkatiri husu ba jerasaun foun sira hotu, atu bele lee no rona didiak historia independensia Timor Leste nian, mak hafoin bele konta ba ema jerasaun tuir mai tan, tanba lider rejistensia balun konta sala historia ukun aan nian, nunee jerasaun kontinuador sira tenke hasae valor estratejiku dezenvolvimentu rai laran.*

Reportajen: Blandina Mauno
Editora: Carme Ximenes

LEAVE A REPLY

Please enter your comment!
Please enter your name here