DILI – Partidu Kmanek Haburas Unidade Timor Oan (Khunto), konkorda halo koligasaun ho Fretilin, Tanba hakarak alkanza povu nia mehi neebe Khunto hatoo iha tempu.
Hafoin remata enkontru segunda ronde ho Partidu Fretilin, iha Hotel Novu Turismu Dili, Kinta (17/08/2017), Konsileiru Partidu Khunto Jose do Santos Naimori ba jornalista sira hateten, Khunto konkorda ho koligasaun ho Fretilin, tanba tenke rona povu no militante sira neebe iha kampani.
KHUNTO konkorda ho koligasaun, tanba ita hotu hotu tenke rona mos ita nia militante sira neebe iha kampania, portantu liu husi koligasaun para ita bele alkanza sira nia mehi durante ita hato iha kampania,” dehan Naimori.
Nia dehan, Khunto prontu ona atu koligasaun, depois iha Domingu oin mai sei hakotu desizaun ida neebe maka atu ba koligasaun nian hodi forma Governu, karik iha segundu publika sei rona.
Iha fatin hanesan Sekjer Partidu Fretilin Mari Alkatiri hateten, Fretilin inisiativa konvida fali Khunto mai halo diskusaun, nunee mos horseik PLP para define atu hakat ba oin nee halo nusa. Portantu hanesan uma kain ida, koligasaun ho paridu rua nee PLP, Khunto ho Fretilin nee mutua, maibe ordamatan, zanela nakloke ba sira seluk mos. Carme Ximenes/EST2