Alkatiri: Laiha Duvidas Governu Hadia Povu Nia Moris

Sekretariu Jeral Partidu Fretilin Dr. Mari Alkatiri, hatete, laiha duvidas governu atu hadia povu nian moris, ho Orsamentu Jeral Estadu (OJE) 2021, neebe promulga ona husi Prezidente Republika, Francisco Guterres Lú-Olo. (Foto: Facebook)

DILI, STLNEWS.co – Sekretariu Jeral Partidu Fretilin Dr. Mari Alkatiri, hatete, laiha duvidas governu atu hadia povu nian moris, ho Orsamentu Jeral Estadu (OJE) 2021, neebe promulga ona husi Prezidente Republika, Francisco Guterres Lú-Olo.

“Hau rona katak, governu atu halo sira nian retiru ida, para atu deskute ida nee, hau hein sira halo retiru deskute, sira nian konkluzaun mak sei koalia, agora hau koalia antes hanesan hau komanda fali governu, laiha duvidas governu ida nee kompromitidu atu hadia povu nian moris. Hau apoiu katak, governu ida nee hakarak hadia povu nian moris, selae hau mos la apoiu, hau apoiu governu totalmente, ho hau nian esforsu mos mak ajuda forma governu ida nee, entaun hau apoiu totalmente. Hein governu nee sempre sei presiza rona hau, la ignora hau kontenti tanba sira sei rona hau, maibe hau laos poder informal, no hau lakohi komanda,” dehan Alkatiri ba jornalista hafoin sai orador iha seminiariu SEKoop iha salaun Katedral Dili, Tersa (29/12/2020).

Eis Primeiru Ministru nee akresenta, nia sempre respeita ba orgaun soberania hotu-hotu, nia iha serteza ida katak, vontade iha, tenke organiza deit metus de traballu, no tenke organiza deit halo mudansa barak iha sistema.

“Imi labele haree deit ba iha montante orsamentu, maibe tenke haree atu halo saida iha tinan oin, imi haree deit ba osan, maibe orsamentu ida nee, orsamentu baze de programa, no atu hatama ba bolsu kaer hetan kedas, nee hotu hatudu ona katak, governu iha vontade halo kontrola no halo jestaun neebe diak liu, agora kapasidade membru ida-idak nian, nee ita tenke dezenvolve lalais,” nia dehan.

Iha parte seluk, Prezidente CCI-TL Oscar Lima, hatete, ho Orsamentu Jeral Estadu 2021, bele haree no resposta ona povu nian moris, nomos bele rekopera diak liu tan ekonomia iha rai laran, nunee mos prosesu dezenvolvimentu bele lao fila-fali, nomos governu bele ezekuta osan ida nee ho diak.

“Ita hein katak, OJE 2021 nee bele haree povu nian moris, nomos governu presiza halo ezekusaun neebe mak diak, oinsa mak osan ida nee bele ezekuta tuir programa governu nian, neebe ita nian governu planea tiha ona,” dehan nia.

Entretantu Ofisial Programa AJAR, Inocencio de J.Xavier, hatete, OJE 2021 presiza mos investe iha setor neebe mak importante, no governu bele ezekuta osan ida nee ho diak, tuir planu neebe mak iha.*

Reportajen: Madalena Horta/Jacinta Sequiera
Editor: Ekipa STL

LEAVE A REPLY

Please enter your comment!
Please enter your name here