Amancia Araujo: Hau Hato’o Agradese Ba Nai Maromak

DILI, STLNEWS.co – Amancia Jeje da Silva do Rosario de Araujo sente kontente no orgullu, i agradese ba Aman Maromak, tanba ho Maromak nia grasa no tulun, nia bele sai primeiru lugar iha eventu Grand Final Konkursu Kanta Solo, neebe realiza iha Salaun Multifunsaun Igreja Hosana Dili, Sabadu horiseik (18/09/2021).

Eventu nee realiza hodi selebra loron aniversariu Igreja Hosana Dili ba dala 41 (21 Setembru 1980-21 Setembru 2021). Sarani Igreja Hosana Dili, selebra loron moris Igreja Hosana Dili ho misa iha Domingu nee (19/09/2021).

Bainhira ekipa juri nain tolu kompostu husi Jeciliana Auxiliadora Lopes de Araujo (Artista), Daniel Tome Boavida (Artista) no David Cesario Gusmao de Oliveira alias Gerson Oliveira (Artista), fosai rezultadu katak, konkorente Amancia Jeje da Silva do Rosario de Araujo sai primeiru lugar ho valor 542, situasaun iha palku hakmatek no Amancia hakruuk, hodi reza ba Aman Maromak.

“Dala barak ona hau partisipa iha kompetisaun kanta musika, maibe foin primeira vez hetan rezultadu diak, hanesan sai primeiru lugar iha eventu ida nee. Tanba nee, bainhira ekipa juri fo sai rezultadu, hau sai primeiru lugar, hau sente atu tanis no hakruuk hodi reza ba Aman Maromak. Tanba ho grasa Maromak nian, iha oportunidade ida nee hau bele sai primeiru lugar iha kompetisaun musika,” dehan Amancia ba STL hafoin simu premiu iha Salaun Multifunsaun Igreja Hosana Dili, Sabadu horiseik (18/09/2021).

Iha biban ida nee, nia mos hato’o agradese wain ba kolegas, inan-aman, ekipa juri no komisaun organizadora eventu kompetisaun kanta musika, tanba ho sira nia apoiu no motivasaun, finalmente nia bele hetan rezultadu neebe diak.     

“Ho sira hotu nia apoiu no reza, hau bele sai primeiru lugar iha kompetisaun kanta solo nee. Hau mos hato’o hau nia mensajen ba hau nia kolega sira, neebe la liu eventu Grand Final konkursu kanta musika solo, lalika laran triste, maibe esforsu nafatin para iha eventu seluk mai bele partisipa tan, nunee talentu neebe iha ona bele dezenvolve diak liutan,” dehan Amancia.

Bainhira husu konaba nia preparasaun ba kompetisaun ida nee, Amancia espresaun kontente hatete katak, ninia preparasaun durante semana tolu deit. “Iha semana tolu nia laran hau prepara an atu tuir kompetisaun musika nee. Iha preparasaun nee hau seriu treinu no finalmente hetan rezultadu diak,” katak Amancia.

Iha eventu nee, konkorente nain haat (4) kompete iha eventu nee. Tuir lolos konkorente nain lima (5), maibe konkorente ida ho naran Eliadora Pinheiro dos Santos rezigna an antes realiza kompetisaun. Konkorente nain haat (4) neebe kompete iha kompetisaun nee mak, Amancia Jeje da Silva do Rosario de Araujo (Primeiru lugar), Mateus da Costa (Segundu lugar), Leonizio Moniz Gusmao (Terseiru lugar), Anastacia Abilio Viana Gomes (Kuatru lugar).

Xefe Komisaun Organizadora Eben Rifqy Taufan Sitopu hatete, nia sente orgullu, tanba eventu kompetisaun kanta musika igreja nian nee bele realiza ho diak.

“Hau sente kontente tebes, tanba eventu kompetisaun kanta musika bele realiza ho diak. Hau mos la haluha hato’o agradese ba ekipa komisaun organizadora, neebe servisu makaas to’o eventu nee realiza. La haluha mos hato’o agradese ba Xefe sarani Igreja Hosana Dili, Pastor Moises da Silva no Prezidente IPTL, Pastor  Domingos Alves, inklui doador sira neebe fo suporta hodi realiza eventu ida nee,” dehan Eben.*

Reportajen: Yulius Ora/Mikael Mali Mau

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Vasina Pfizer Importante Ba Labarik Sira

DILI, STLNEWS.co – Tuir Ministra Saude Odete Maria Freitas Belo dehan, labarik sira presiza simu vasina Pfizer nee, tanba importante tebes hodi bele prevene moras...

Update Covid-19 TL 27 Outubru: Kazu Pozitivu 7 & Rekuperadu Nain 3

DILI, STLNEWS.co – Ohin loron 27 fulan Outubru tinan 2021, liu husi Centro Integrado Gestão de Crises, Sala Situação (CIGC-SS) rejistu tan kazu konfirmadu...

Estudante ESJ Simu Ona Vasina Pfizer

DILI, STLNEWS.co – Eskola Ensinu Sekundariu Jeral (ESJ) 4 Setembru simu ona vasina Pfizer ba doze primeiru, atu nunee bele halo prevensaun ba Covid-19. Informa...