Amancia Araujo Sai Primeiru Lugar Konkursu Kanta Solo

DILI, STLNEWS.co – Konkorente sorteu numeru 3, Amancia Jeje da Silva do Rosario de Araujo sai primeiru lugar iha eventu Grand Final, Konkursu Kanta Solo neebe realiza iha Salaun Multifunsaun Igreja Hosana Dili, Sabadu horiseik (18/9/2021). Eventu nee realiza hodi selebra loron aniversariu Igreja Hosana Dili ba dala 41 (21 Setembru 1980-21 Setembru 2021).

Iha eventu kompetisaun kanta musika nee, Amancia Araujo aprezenta musika rua hanesan, musika obrigatoriu ho titlu “Agradese Nai “ no musika eskoilidu ho titlu ”Indah Pada Waktunya“. Konkorente Amancia Araujo aprezenta musika rua nee ho diak tebes. Nunee, ekipa juri nain tolu (3) kompostu husi Jeciliana Auxiliadora Lopes de Araujo (Artista), Daniel Tome Boavida alias Danny (Artista) no David Cesario Gusmao de Oliveira alias Gerson Oliveira (Artista), deside konkorente Amancia de Araujo sai primeiru lugar ho valor 542.

Husi konkorente nain haa (4) neebe kompete iha eventu Grand Final Konkursu Kanta Solo nee, ekipa juri deside mos konkorente ho numeru sorteu haa (4) ho naran Mateus da Costa sai segundu lugar. Mateus da Costa aprezenta musika ho titulu “Agradese Nai no Renungkanlah” .

Nunee mos, ekipa juri deside konkorente numeru sorteu ida (1) ho naran Leonizio Moniz Gusmao sai nuudar terseiru lugar. Leonizio Gusmao aprenzenta musika ho titlu” Agradese Nai no Terangilah Jalanku”.

Ekipa juri mos deside konkorente numeru sorteu lima (5) ho naran Anastacia Abilio Viana Gomes sai nuudar kuatru lugar (Juara harapan). Anastacia Gomes aprezenta musika titlu “Agradese Nai no Nafatin Agradese”.

Tuir lolos, konkorente nain 5 kompete iha eventu nee, maibe konkorente ida ho naran Eliadora Pinheiro dos Santos rezigna an antes realiza kompetisaun.

Eventu kompetisaun kanta musika, hodi selebra loron aniversariu Igreja Hosana Dili ba dala 41 nee realiza, hetan suporta husi Pertamina Internasional Timor, SA (PITSA), Telkomcel, Sylvia Printing Dili, Bravo Internasional, BRI Dili no Centro.

Eventu kompetisaun kanta musika nee, espesialmente loke husi Xefe sarani Igreja Hosana Dili, Pastor Moises A. da Silva no loke mos ho reza neebe prezide husi Moderador Sinodo Igreja Protestante iha Timor Leste (IPTL), Pastor Domingos Alves, S.Si.Teol.

Liu husi nia diskursu, Pastor Moises da Silva hatete, nia kontente tebes, tanba maske iha situasaun pandemia Covid-19, maibe komisaun organizadora ba selebrasaun loron aniversariu Igreja Hosana Dili ba dala 41, esforsu an bele realiza eventu ida neebe, atu promove talentu juventude sira nian iha area musika.

“Liu husi oportunidade ida nee, lori sarani Igreja Hosana Dili nia naran, hau hato’o agradese ba ekipa komisaun organizadora neebe dirije husi  Eben Rifqy Taufan Sitopu (Atual Xefe Imigrasaun KBRI Dili). Nia (Eben-Red.) husik hela buat diak ba ita, liu – liu ba juventude sira neebe iha talentu iha area  musika. Espesial hau hato’o agradese ba Pak Eben nia inisiativa, atu promove talentu juventude sira iha area musika,” dehan Pastor Moises da Silva.

Aleinde nee, nia mos hato’o agradese ba doador sira nia suporta, hodi realiza eventu nee, hanesan, Pertamina Internasional Timor, SA (PITSA), Telkomcel, Sylvia Printing Dili, Bravo Internasional, BRI Dili no Centro. Nia mos hato’o agradese ba inan-aman konkorente sira, neebe fo apoiu moril no motiva sira, hodi dezenvolve sira nia talentu iha mundu musika, liu – liu musika igreja nian.

Iha fatin hanesan, Xefe Komisaun Organizadora Eben Rifqy Taufan Sitopu hatete, nia sente orgullu tanba eventu kompetisaun kanta musika igreja nian nee bele realiza ho diak.

Tuir nia, objetivu husi eventu kompetisaun kanta musika nee, atu apoiu governu prevene no hakotu korente haklekar virus corona. Tanba nee, ba dahuluk eventu kompetisaun nee halao liu husi virtual, ho razaun iha situasaun Covid-19, no governu implementa regra lockdown iha Dili. Maibe depois, governu hakotu regra lockdown iha Dili, Komisaun Organizadora deside hodi realiza Grand Final Konkursu Kanta Solo, iha Salaun Multifunsaun Igreja Hosana Dili.

“Hau sente kontente tebes, tanba eventu kompetisaun kanta musika neebe bele realiza ho diak. Hau mos la haluha hato’o agradese ba ekipa komisaun organizadora, neebe serbisu makaas to’o eventu nee realiza. La haluha mos hato’o agradese ba Xefe sarani Igreja Hosana Dili, Pastor Moises da Silva no Moderador IPTL, Pastor Domingos Alves, inklui doador sira neebe fo suporta hodi realiza eventu ida nee,” dehan Eben.

Ekipa Komisaun Organizadora neebe mak halao servisu makaas, husi inisia to’o realiza eventu kompetisaun musika nee mak, Eben Rifqy Taufan Sitopu (Xefe Aniversariu Igreja Hosana Dili, ba dala-41), Agus Feoh, Ade Purnama, Julmia L. da Silva, Adi Vasconcelos Pinto, Levi Vasconcelos Pinto, Agus Kehi no sira seluk neebe fo sira nia kontribuisaun hodi realiza eventu nee.

Iha eventu nee Komisaun Organizadora implementa nafatin regra protokolu saude nian hanesan, uza maskara, uza hand sanitizer no asegura distansia sosial.

Partisipa iha kompetisaun kanta musika igreja nian nee, aleinde Xefe sarani Igreja Hosana Dili, Pastor Moises da Silva, Moderador IPTL, Pastor Domingos Alves, Padre Urbanus Bunga Lolon, SVD, Diretur Sylvia Printing, Victor Gogo, reprezentante doador husi Pertamina, BRI, Centro, Bravo Internasional, Telkomcel no konvidadus sira, inklui inan-aman konkorente sira.*

Reportajen: Yulius Ora/Mikael Mali Mau

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Vasina Pfizer Importante Ba Labarik Sira

DILI, STLNEWS.co – Tuir Ministra Saude Odete Maria Freitas Belo dehan, labarik sira presiza simu vasina Pfizer nee, tanba importante tebes hodi bele prevene moras...

Update Covid-19 TL 27 Outubru: Kazu Pozitivu 7 & Rekuperadu Nain 3

DILI, STLNEWS.co – Ohin loron 27 fulan Outubru tinan 2021, liu husi Centro Integrado Gestão de Crises, Sala Situação (CIGC-SS) rejistu tan kazu konfirmadu...

Estudante ESJ Simu Ona Vasina Pfizer

DILI, STLNEWS.co – Eskola Ensinu Sekundariu Jeral (ESJ) 4 Setembru simu ona vasina Pfizer ba doze primeiru, atu nunee bele halo prevensaun ba Covid-19. Informa...