SUAI, STLNEWS.co – Autoriedade Nasional Petroleu no Minerais (ANPM) realiza atividade seminar, hodi fahe informasaun konaba industria petroleu no minerais ba jornalista sira husi media nasional no media privadu, hodi kapasita jornalista no editor sira nia konhesimentu konaba industria mina no gas.
“Objetivu husi programa nee, ANPM atu fahe informasaun konaba industria nee nia lalaok, hanesan ita boot sira hatene, ANPM haree konaba petroleu nomos minerais. Espera katak ita nia programa iha loron hirak tuir mai, programa ida nee mak iha duni ninia kontinuadade, iha benefisiu i ita fiar katak, ita bele servisu hamutuk.
Ami hatene katak servisu jornalizmu laos buat ida neebe mak fasil,” hatete Prezidente ANPM, Florentino Soares Ferreira iha Salaun Aero Porto Internasional Kay Rala Xanana Gusmão, Suai, Kuarta nee (22/3/2023).
Prezidente ANPM afirma, dala barak komunidade sira eziji jornalista sira atu sai ema hotu, sai ema se deit, ida nee mak dala barak liu difisil, dala barak liu mosu lamentasaun barak iha publiku.
“Maibe sira haluha tiha katak, jornalista laos peritu ba area ida ka rua, maibe publiku ga entidade hotu eziji i obriga ita boot sira “jornalista” atu sai ema neebe tekniku, hanesan iha setor petroleu, dala ruma iha relasaun internasional, politika ita boot sira tenki halo no relata informasaun ba asuntu neebe luan tebes-tebes,” hatete nia.
Tanba liu husi atividade ida nee, ANPM hanesan entidade estadu ida iha dever moral atu kontinua servisu ho jornalista sira, garantia katak jornalista fahe informasaun liu husi notisia ba publiku no povu ho buat neebe mak los.
“Ho ida nee mak ANPM kontinua nafatin hakarak halao atividade ida nee, ita bele servisu hamutuk, ita bele konhese didiak industria ida nee. Ami la hakarak ita boot sira ou ami nia espetativas laos atu obriga ita boot sira sai kedas enjenheiru, sai kedan jeologu no sai kedan ema neebe komprende setor ida nee, mais pelu menus ita boot sira simu informasaun neebe bele eleva ita boot sira nia konhesimentu, atu bainhira halo intervista ruma ou halo redasaun ruma ka hakerek, relata notisia ruma, ita boot sira hatene ona ninia konteudu no lalaok husi industria nee rasik,” katak Prezidente ANPM nee.
Prezidente ANPM haktuir, ho hanoin hirak nee ANPM liu husi ninia media neebe lidera husi David Hugo hamutuk ho jornalista sira hotu bele kontribui diak liu tan ANPM ho media nia servisu hamutuk.
Iha fatin hanesan, reprezentante Prezidente Konselhu Imprensa, Konsilheiru Konselhu Imprensa, Amitu Qonusere Araujo hatoo agradese wain ba ANPM bele fahe ona informasaun sobre asuntu industria mina no gas ba jornalista sira, hodi aumenta tan konhesimentu jornalista nian iha area mina no gas.
“Agredese wain ba ANPM tanba bele fo espasu ba jornalista sira hodi hahu kapasita sira nia aan liu husi area neebe mak daudaun nee ANPM iha. Konselhu Imprensa kontinua apoiu ba formasaun sira neebe mak oferese ba jornalista sira hodi bele aumenta sira nia konhesimentu iha area industria mina no gas,” dehan nia.
Amitu konsidera, meus neebe dadaun nee ANPM halo nee importante tebes, tanba liu husi programa nee bele aumenta konhesimentu jornalista sira iha area industria, hodi uza linguajen neebe fasil atu leitores sira lee no haree, bainhira sira halo publikasaun iha sira nia media.
(cri)
