Antes 8 Abril, PN Foti Imunidade Ba Kalohan

Prezidente Parlamentu Nasional (PPN), Aniceto Guterres. (Foto: Media PR)

DILI, STLNEWS.co – Prezidente Parlamentu Nasional (PPN) Aniceto Guterres hatete, antes loron 8 fulan Abril, Parlamentu Nasional sei foti imunidade ba Xefi bankada PD, Deputadu Antonio da Conceição hodi hatan iha tribunal.

Prezidente Parlamentu Nasional (PPN), Aniceto Guterres hatoo kestaun nee ba jornalista, bainhira remata halo enkontru regular ho Prezidente Republika Francisco Guterres Lú Olo iha Palasiu Prezidente Bairru Pite, Segunda (22/02/2021).

PPN hatete, kazu deputadu Kalohan nee prosesu seluk ida, nee iha tiha ona tribunal, no iha fulan ida nee tenke foti imunidade.

“Kalohan nee prosesu seluk, ida nee iha tiha ona tribunal, iha fulan ida nee nia laran tenke foti tanba 8 de Abril nia tenke hatan iha tribunal, ita boot sira akompana deit antes 8 de Abril ami foti ona imunidade, iha ona ajenda soke seidauk determina loron, tanba sei iha fulan ida tomak los, Fevereiru mos seidauk hotu, fulan ida seidauk hotu ami sei iha tempu atu enkuadra iha ajenda parlamentu nasional nia,” tenik PPN nee.

Aniceto dehan, atu sertu ka la sertu akompana deit, maibe PPN garante katak antes loron 8 fulan Abril, Parlamentu Nasional sei foti Imunidade ba deputadu kalohan nee rasik.

“Atu sertu ka la sertu akompana deit pratika mak sei hatudu, lae orsida hau dehan sertu tiha mak la jadi fali, maibe hau bele garante, hanesan ohin hau hatete antes 8 de Abril tenke foti, tanba nee komprimisiu parlamentu nia, no parlamentu tenke hatudu ninia kooperasaun diak ho instituisaun estadu sira seluk liu-liu konaba justisa” katak nia.

Antes nee, liu husi konferensia imprensa, kinta (14/02/2021), portavos atual Vice Sekretaria Meza PN, Deputada Lidia Norberta, dehan, Parlamentu Nasional hasai imunidade ba Deputadu PD Antonio da Conceição atu ba presta informasaun iha tribunal tuir pedidu tribunal nian.

Aleinde ida nee fo mos autorizasaun ba Deputada Primeira Vice PN Maria Angelina Sarmento, no mos segundu Vice PN Luis Roberto, atu ba presta mos deklarasaun hanesan sasin tuir pedidu tribunal nian rasik.*

Reportajen: Emerenciana Pinto/Guilhermina Franco
Editora: Domingas Gomes

LEAVE A REPLY

Please enter your comment!
Please enter your name here