APC Apoiu Ona Emerjensia Ba Vitima

DILI, STLNEWS.co – Oras nee daudaun governu liu husi Autoridade Protesaun Civil (APC) apoiu ona emerjensia ba vitima dezastre naturais sira ho sasan baziku no distribui mos kalen.

“Ita apoiu emerjensia nee mak fo apoiu sasan bazika sira mak hanesan foos, mina, súpermi, balde, sabaun, rinso. Apoiu rekuperasaun nian mak distribui kalen, ai, besi, semente ho pregu,” hatete Xefe Gabinete Relasaun Esterna no Komunikasaun (GREC), Cesário da Silva Marques ba jornalista sira liu husi konferensia imprensa iha salaun APC, Segunda (15/01/2024).

Nia esplika, konaba apoiu ba vitima sira, presiza haree mos ba iha tipu estragu nian hanesan estragu kmaan, natoon no estragu total.

“Bainhira ita verifika tiha dadus hotu, hafoin ekipa APC sei fo apoiu ho tipu rua, emerjensia no rekuperasaun,” nia informa.

Nia deklara, ba  apoiu emerjensia iha munisipiu 10, mak komando autoridade protesaun sivil ho parseiru sira fo ona apoiu emerjensia ba iha vitima sira.

“Iha ita nia Munisipiu Dili, APC seidauk fo apoiu emerjensia, tanba ekipa sira sei haree hamutuk hela ba dadus final, hodi fo resposta ba vítima inundasaun sira neebe mak akontese iha Dili, vitima sira hamutuk 386,” nia hatutan.

Nia tenik, daudaun nee SEPS-APC liu husi diresaun nasional Bombeiro iha kada munisipiu halao hela servisu iha terrenu mak hanesan tesi ai neebe monu taka estrada publiku no ameasa komunidade nia uma.

“Iha Munisipiu Dili nia, ita nia korpu bombeiru sira lori bee rega no fase mos komunidade sira nia uma neebe mak afetadu husi inundasaun, aleinde nee ita kontinua hamoos estrada publiku,” nia koalia.

(jen)

LEAVE A REPLY

Please enter your comment!
Please enter your name here