DILI,STLNEWS.co – Alumi Parlamentu Foinsae Timor Leste (APFTL) kria espasu ba juventude sira husi Munisipiu 13 inklui RAEOA, hodi halo diskusaun konaba prioridade no dezafiu setor produtivu sira, hodi kontribui ba diversifikasaun ekonomika iha Timor Leste.
Kestaun nee hatoo husi Prezidente APFTL, Zaulino Gomes ba jornalista sira, hafoin realiza atividade diskusaun ba joven sira iha Salaun Delta Nova, Dili, Tersa nee (25/04/2023).
Nia dehan, atividade ohin nee espasu nakloke ba joven sira, APFTL konvida joven sira liu liu joven neebe halao atividade iha seitor produtivu sira iha Munisipiu hotu-hotu nomos RAEOA.
“Entaun ohin diskusaun nakloke entre joven sira para atu buka hatene prioridade no dezafiu sira, liu-liu iha seitor produtivu neebe mak fokus oinsa kontribui ba diversifikasaun ekonomika iha ita nia rai,” dehan nia.
Nia informa, ohin loron tenki koalia asuntu sira hanesan nee, tanba joven nee idade neebe mak okupa mos pursentu boot, entaun kampu trabalhu mos menus la halimar.
Nia informa, presiza hateke ona oportunidade seluk neebe joven sira rasik mak kria, oinsa governu nia apoiu ba sira.
Nia akresenta, aban mos sei iha dialogu aberta ida ho Partidu Politiku sira, para oinsa rona hodi kria empregu iha Timor Leste.
Iha sorin seluk, Juventude Zaquiel Martins do Carmo hatete, APFTL organizar atividade ida nee oinsa atu envolve joven kreativu sira neebe mai husi Munisipiu inklui iha Dili, atu hare hamutuk peskiza balu neebe mak Oxfam agora halo hela, razaun ho problema sira neebe mak daudaun joven sira hasoru hela iha nivel Munisipiu.
“Ami hanoin ida nee diak la halimar, tanba agora daudaun ita atu tama ba eleisaun Parlamentar tanba nee mak ita buka atu deskobre hamutuk diak liu tan,” dehan nia.
Nia informa, aban mos sei iha diskusaun ho Partidu Politiku sira entaun problema ida nee hanesan bukae ida para bele ajuda lÃder Partidu Politiku sira, atu sira bele lori hanesan programa ida, atu sira bele hare, wainhira sira manan Parlamentar tuir governu bele kaer isu joven sira nian, hanesan programa importante neebe mak bele ajuda nia joven Timor oan sira, oinsa para labele ba buka servisu iha rai liur, atu esplora oportunidade iha rai laran.
Entretantu, Juventude Agustinho da Costa mos hatete, APFTL kria espasu ida nee diak, oinsa mak joven sira bele espresa sira nia opiniaun balu relasiona ho seitor produtivu iha rai laran.
“Espera katak ita nia dezafiu no prioridade sira neebe mak ita espresa governu tau Iha sira nia prioridade,”dehan nia.
(mar)
