ERMERA, STLNEWS.co – Atu hasae produsaun ai haan iha rai laran, governu tenki tulun povu agrikultor sira liu husi fasilita kreditu ba sira, atu nunee sira bele sosa fini ba kuda.
“Osan neebe parlamentu aloka atu fasilita kreditu ba povu kiik sira nee diak, fasilita mos povu agrikultor sira, parte ida atu hasae produsaun ai haan iha rai laran no redus importasaun husi rai liur, tan nee tenki fasilita kreditu hodi apoiu povu agrikultor sira. Hodi halo toos ho natar, atu nune bele hasae produsaun,” kestaun nee fo sai husi Feto Emprezaria, Eugenia Goncalves ba STL, Sabadu (26/08/2023) iha Suku Obulo, Postu Administrativu Atsabe, Munisipiu Ermera.
Nia afirma, maioria agrikultor sira iha nee uza hotu osan imprestimu husi Kaibauk, nomos kooperativa balun neebe loke iha Postu Atsabe, tanba nee husu ba governu liu husi Banku Timor nian atu fo kreditu ho funan kiik ba grupu agrikultor sira.
Tuir nia katak, povu iha nee maioria moris hanesan agrikultor halo modo, hakiak animal nomos bisnis, maibe dala ruma grupu kiik sira nee hasoru problema finanseiru, ba kreditu kooperativa nian hodi halo negosiu, maibe ho funan boot, tanba nee husu ba governu atu tau osan iha banku hodi fasilita kreditu ba povu kiik sira.
(mad)
