Araõ: Duvidas Besik Termina EE, Mosu Pozitivu Covid-19 Derepente

Eis Prezidente Parlamentu Nasional (PPN), Deputadu Arão Noe. (Foto: STL/Domingas Soares)

DILI, STLNEWS.co – Eis Prezidente Parlamentu Nasional Araõ Noe, mosu duvidas bainhira atu termina ona estadu emerjensia, sempre mosu moras pozitivu covid-19 derepente.

“Hau duvidas tanba haree sempre akontese kuandu besik termina ona estadu emerjensia, moras pozitivu Covid-19 mosu derepente, halo hau duvidas oituan,” lia hirak nee hatoo husi Eis Prezidente Parlamentu Nasional (PN) Araõ Noe ba jornalista sira iha PN, Kinta (01/10/2020).

Nia afirma, tanba besik remata estadu emerjensia, atu halo proposta foun fali nee mosu moras pozitivu covid-19 ema nain 1 tan ona, depois liu tiha semana ida hanesan nee lakon tiha ona nee laiha ona,”

Nia hatutan, depois liu tiha besik atu termina tan ona estadu emerjensia mosu fali tan moras covid pozitivu nain 1, hau haree hanesan buat nee regula tiha kedas ona, los duni kalae ida nee maka halo hau mos duvidas, tanba laos dala ida deit kuaze estadu emerjensia dala 3 ou dala 4 nee sempre mosu ho maneira ida nee.

“Hau hanoin tutuir lolos lapresiza hamosu hanesan nee, karik presiza atu estende nee estende deit, lapresiza halo maneira hanesan nee,” dehan nia.

“Estende estadu emerjensia nee iha parte pozitivu neebe ita presiza haree mos, hodi prevene ema husi liur tama mai atu nunee labele alastra covid nee tama mai Timor laran, ida nee hau hanoin asaun ida diak, para oinsa atu prevene moras covid-19 nee, tanba ita seidauk iha legislasaun ida para atu bele kontrola no limita ema nia sirkulasaun, entaun emerjensia nee bele halo tanba ita sei laiha baze legal seluk neebe presija estadu emerjensia para bele hodi prevene.

Tuir lolos nee bele rezolve situasaun sira nee ho lei seluk, lei ida neebe maka prezidente veta tiha, agora husik hela iha meja leten, parlamentu haree fali ba ida nee hodi bele fo kompetensia ba autoridade sira kontrola deit, lapresiza ho estadu emerjensia, maibe ita seidauk iha baze legal sira seluk, dalan uniku maka ita tenki halo ho estadu emerjensia.

Nia haktuir, ho estadu emerjensia nee iha limitasaun ba deit fronteiras, maibe iha rai laran haree durante nee livre hela no sirkula hela, ba oin laiha impaktu sirkulasaun sidadaun sira atu livre, desloka ba liur no tama mai maka iha limitasaun sirkulasaun maibe iha rai laran nee buat hotu lao diak.

“Ita laiha baze legal sira seluk entaun estadu emerjensia nee tenki iha para prevene, opasaun seluk laiha tenki uza estadu emerjensia selae limitasaun ema mai husi liur maka lori moras nee tama mai iha TL,” tenik nia.

Durante fulan hira ona halo estadu emerjensia atu ba dala 6 ona, ita nota ho aplikasaun estadu emerjensia nee limita tiha suspensaun ema nian neebe ita bele kontrola, hodi deteta kedas sira neebe moras karik mai deteta hanesan agora no ita sempre tama iha kuarentena.

“Depois tama iha kuarentena halo ona loron 14 nee, halo teste ba sira, bainhira hetan moras hatama kedas ba izolamentu hodi halo tratamentu, depois rekopera tiha nia saude, ema nee bele ba fali iha komunidade nia leet, tanbe nee hau hanoin iha susesu diak iha parte ida nee,” katak nia.

Reportajen: Natalina Lopes
Editor: Ekipa STL

LEAVE A REPLY

Please enter your comment!
Please enter your name here