Arcebispo: Covid-19 Obriga Labele Halibur Hamutuk, Maibe La Taka Dalan Agradese Ba Maromak

Liu husi omilia, Arcebispo Metropolitana Diocese Dili, Dom Virgilio do Carmo da Silva, SDB, katak pandemia Covid-19 maka obriga ita labele halibur hamutuk hodi selebra misa, maibe la taka dalan ba atu agradese ba maromak. (Foto: STL/Donaciano Magalhães)

DILI, STLNEWS.co – Liu husi omilia, Arcebispo Metropolitana Diocese Dili, Dom Virgilio do Carmo da Silva, SDB, katak pandemia Covid-19 maka obriga ita labele halibur hamutuk hodi selebra misa, maibe la taka dalan ba atu agradese ba maromak.

Bibi atan nee dehan, todan duni mai ita kalan ida nee laos hanesan kalan bain-bain ka hanesan tinan tinan kalan ikus tinan foun ninian, iha kalan tinan tuan ho tinan foun ba misa hamutuk hodi agradese ba maromak.

“Maibe tinan ida nee tanba pandemia Covid-19 obriga ita labele halibur hamutuk, maibe ida nee laos taka dalan ba ita atu agradese maromak no la taka dalan ba ita atu fo tempu itaun ba maromak molok ita husik tinan 2020 no la taka dala ba ita atu hakmatek ituan hodi simu tinan foun neebe atu mai dadaun, no kalan ida nee atu fo obrigadu ba maromak ba moris mai ita idak-idak,” omilia Arcebispo ba sarani hotu iha Igreja Katedral Vila Verde, Kinta (31/12/2020).

Bibi atan nee afirma, no obrigado ba maromak ba saude tanba, ita hatene katak husi fulan Marsu mai iha mundu no partikularmente iha ita nia rai too momentu ida nee obriga ita labele festeja hamutuk loron boot nian hanesan bain-bain.

“Maibe maromak nunka abandona ita no maromak la husik ita maske, rai ida nee no povu ida nee kiik no kiak maibe boot iha maromak nia futar oin, maromak nafatin tau matan no haraik bensa mai ita, ita sente ita koko no ita haree so matan delek sira maka dehan laiha, maibe fiar nain sira no timor oan sira iha matan no fuan atu haree diak maromak ninian atu agradese,” tenik Arcebispo.

Loos duni ita labele hamutuk selebra ita nia misa, maibe nuudar familia halibur hamutuk hodi agradese ba diak neebe maromak fo iha duni momentu susar ida nee maka Timor oan barak sai no halo karidade hodi tulun hirak neebe kiik no hirak neebe kiak.

Maibe ita agradese ba maromak tanba hanorin ita atu loke ita nia fuan sai laran luak ba malu, liu-liu iha susar tinan ida nee ita hotu haree tuir no akonpania.

Reportajen: Domingas Soares
Editor: Ekipa STL

LEAVE A REPLY

Please enter your comment!
Please enter your name here