Arcebispo: Sarani Tenke Tuir Atitude Tolu Jesus Nia

Arcebispo ba Arquidiocese Metropolitana Dili, Dom Virgilio do Carmo da Silva, SDB. (Foto: Espesial)

DILI, STLNEWS.co – Arcebispo ba Arquidiocese Metropolitana Dili, Dom Virgilio do Carmo da Silva, SDB hatete tempu santa sarani sira tenke banati tuir atitude tolu Jesus Kristu nia, oinsa refleta, komportamentu, no silensiu.

Arcebispo Metropolitana Dili hatoo kestaun nee liu husi homilia bainhira iha selebrasaun Domingo Ramos, iha Igreja Katedral Dili, Domingu (28/03/2021).

“Ita bele dehan atitude tolu ita nain Jesus Kristu nia, atu ita koko atu bele komprende oinsa atu atitude tolu nee sai ita nia, liu liu iha tempu santa nee primeiru hakarak ita refleta oituan, laos haree hanesan maromak deit, maibe ohin primeiru parte ita haree Jesus Nia natureza nuudar ema oinsa nia sente nia an mesak nia terus ba ema nia, segundu Jesus nia komportamentu hasoru ema sira nee ba kaer nia, terseiru Jesus nia silensiu”

Arcebispo dehan, jestu tolu nee kapas furak bainhira ema idak idak koko iha idak idak nia moris.

“Hanesan ohin hau dehan haree Jesus laos deit nuudar Maromak, maibe nuudar ema. Nuudar ema nee mak ohin nia mos halerik dehan hau laran susar, São Marco uluk nanain aprezenta mai ita ida nee hanesan ohin ita rona dehan hau laran susar atu mate, imi hela iha nee tuur moris neon nain” katak Arcebispo Dom Virgilio.

Bibi Atan Kreda Katolika nee hatutan bainhira Jesus iha Getsemani hakfodak, nakdedar, tauk tamba atu hasoru mate no ameasa, no Jesus tauk mate tanba hadomi moris ida nee no realidade ida nee nia hela ema no presiza ema ruma atu rona nia no bele hakbesik ba nia, liu liu momentu dramatiku iha nia moris nia hakfodak iha mate nia oin.

“Ida nee hakarak hatudu mai ita Jesus maske maromak maibe nia mos ema ida, nia koko hatene terus ita ema nia tanba nia iha natureza iha ita ema nia, ita mos dala barak sente konaba nee. Nunee mos dala ruma ita sente ida nee prova ida neebe forte bainhira iha moris ita hasoru prova hirak nee.” tenik nia.

Nia hatutan dala ruma iha moris ema idak idak nia hasoru ida nee mos tauk hanesan mos dadaun nee hasoru situasaun Covid-19 nia, dala ruma halo ema idak idak tauk hakfodak nakdedar.

Iha momentu sira hanesan nee, bainhira la koko atu infrenta hasoru problema hirak nee mak la buka maromak, moris sai desorientadu sai stres, halo arbiru no dala barak mos sai bulak, maibe Jesus hanorin halo oinsa hasoru situasaun sira hanesan nee liu husi reza.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here