Arche Bispu Kondekora Katekista 30

KONDEKORA - Arcebispo Metropolitana Dili, Dom Virgilio do Carmo da Silva, kondekora Medalla Merito Dom Jaime Garcia Goulart, ba katekista no sarani sira hamutuk nain 30, neebe servisu ba Igreja Katolika durante tinan 40 nia laran, iha ambitu Selebrasaun Missa Existensia Arquedioseze Dili ba 80, Tersa (8/12/2020). (Foto: STL/Donaciano Magalhães)

DILI, STLNEWS.co – Arche Bispu Metropolitana Dili, Dom. Virgilio do Carmo da Silva entrega medalla kondekorasaun ba katekista hamutuk 30, tanba tinan barak sira servisu iha Parokia no Arqui Diocese Dili.

Hatete Dom, Virgilio liu husi diskursu selebrasaun aniversariu tinan 80 ejistensia Diocese Dili, iha Katedral, Dili, Tersa (08/12/2020).

“Ohin iha ita nia leet, iha Katekista lubuk ida neebe simu kondekorasaun. Iha tinan kotuk iha Katekista nain 30 mak simu ona no ohin iha mos katekista nain 30 Diocese hakarak atu rekonese sira nia servisu,” hatete Dom.Virgilio.

Dom. Virgilio hatutan Diocese Dili planu ba futuru, sei kontinua fo medalla kondekorasaun ba Katekista sira seluk neebe fo ona dedikasaun durante tinan naruk, maibe seidauk hetan rekonesimentu.

Medalla neebe simu ona, Dom. Virgilio rekomenda ba Katekista sira atu uza iha selebrasaun misa no atividade relijiozu sira seluk tanba nee hanesan identidade ida.

“Medalla ohin simu nee laos tara deit bainhira ita mate, maibe tara bainhira ita boot sira iha parokia ka iha loron boot sira, iha ita boot sira nia fatin, atu nunee bele lori nafatin identidade,” Bibi atan Diocese Dili hatete.

Arche Bispu fo apresiasaun ba Katekista sira husi arquidiocese Dili hamutuk nain 30 ho servisu husi tinan 1979/1980.

Iha fatin hanesan Katekista, Vicente de Paulo husi Parokia Sao Jose Operariu Remexio Aileu, agradese ba medalla neebe maka nia simu ona husi Arcebispu Dom Virgilio do Carmo da Silva SDB.

“Ba oin, sei servisu diak liutan, sei lori hau nia sarani sira ba Maromak, ba Jesus Kristu ba Nain Feto no hametin unidade sarani Katolika iha hau nia estasaun, liliu iha hau nia parokia no iha hau nia familia,” nia dehan.

Reportajen: Blandina Mauno/Joaninha Belo
Editora: Carme Ximenes

LEAVE A REPLY

Please enter your comment!
Please enter your name here