Asanami Apresia Servisu PNTL

Prezidente Partidu Demokratiku (PD), Mariano Asanami Sabino. (Foto: Espesial)

DILI, STLNEWS.co – Prezidente Partidu Demokratiku (PD), Mariano Asanami Sabino, apresia tebes servisu membru Polisia Nasional Timor Leste (PNTL), tanba durante nee fo ona sira nia dedikasaun hodi bele garantia seguransa ba populasaun iha teritoriu Timor Leste, para bele moris ho hakmatek.

Kestaun nee Prezidente Partidu Demokratiku (PD), Mariano Asanami Sabino, hatoo relasiona ho instituisaun PNTL neebe ohin 27 Marsu 2021, selebra aniversariu ba dala 21.

“Parabens ba membru Polisia Nasional Timor Leste tomak, neebe ohin selebra aniversariu ba da la 21. PNTL nia sevbisu durante tinan 20 ba kotuk hatudu serbisu ida neebe diak tebes, tanba nee husu sira atu mantein nafatin. PNTL ida deit ba povu Timor Leste tomak. La iha partidu, la iha grupu arte marsiais,” dehan Asanami wainhira ho grupu Mama-Bolu remata desinfekta edifisiu Palasiu Governu, Sabadu (27/03/2021).

Tuir nia, PNTL presiza servisu tuir lei ho orden neebe hatuur ona iha konstituisaun hodi garantia liberdade, nunee povu bele moris ho livre.

“Membru PNTL sira, imi hotu nia dedikasaun mak tenke mantein servisu tuir konstituisaun haruka, para bele garantia seguransa no liberdade, nunee populasaun hotu bele moris ho livre,” esplika nia.

Nia akresenta, funsaun no dedikasaun membru PNTL importante tebes, maske deviza la hanesan komandante ho soldadu. Tanba nee ho situasaun defisil agora, maibe instituisaun nee nafatin esperansa povu nia hodi tuur hakmatek.

Reportajen: Ekipa STL

LEAVE A REPLY

Please enter your comment!
Please enter your name here