Asegura Fronteira, Aumenta Salariu PNTL – F-FDTL

Xefe Bankada KHUNTO, Deputada Olinda Guterres. (Foto: Espesial)

DILI, STLNEWS.co – Surtu Covid-19 sae makas iha Nusa Tenggara Timur (Indonezia), tanba nee atu asegura fronteira terestre governu presiza aumenta salariu ba PNTL nomos F-FDTL.

Kestaun ne husi Xefe Bankada KHUNTO, Deputada Olinda Guterres ba jornalista, liu husi plenaria, iha PN, Segunda (18/01/2021).

“Husu ba ministru keta haluha, hatoo hela ba pedidu neebe mak hau hatoo ba ita boot, liu-liu atu aumenta membru PNTL no F-FDTL, atu bele asegura iha neeba, segundu ita atu haruka deit Polisia ho FDTL, atu servisu deit hanesan nee, ho sira nian salariu neebe minimu, hau hanoin koalia bebeik ona, sira atu husik sira nian fen ho oan iha fatin ida, depois sira ba halo seguransa iha fatin ida, tanba nee hau husu ba governu aumenta sira nian salariu, no fo perdiam ba sira. Ami deputadu sira tur iha nee ba halo fiskalizasaun perdiam iha, tanba saida polisia sira labele hetan, fen ho oan han saida, depois balun oan foin moris han saida,” dehan nia.

Olinda hatete, horiseik tuku 5 liu rona informasaun husi Kupang telefone mai, ninia madrinha iha nee ba nomos mane foun iha Atambua atu ba Kupang la diak, mai TL mos la diak entaun hili ba Kupang, iha neeba Covid-19 sira lakohi temi ona Covid-19, maibe sira hein deit ona atu mate.

“Ospital iha Atambua nee ba taka tomak hotu ona, tanba Covid-19, ema pozitivu nakonu, neebe agora ospital taka husi parte ita nian, hau husu ba ministru, karik bele aumenta tan forsa F-FDTL no PNTL, atu bele asegura ita nian fronteira, tanba ita nee laos hakat tasi, fronteira ita bele sura deit minutu bele tama ona iha neeba, neebe husu ba ita kolega deputadu no depatada sira hotu, karik ita nian familia ruma mai husi Atambua no Kupang, diak liu labele ba kaer liman no labele ba hasoru, liu-liu maluk sira neebe mak Bobonaro, Suai no Oecusse,” deputada Olinda afirma.

Deputada nee akresenta, PNTL no F-FDTL halo patroliamentu iha fronteira neeba, nee diak ba povu TL tomak, tanba nee husu dala ida tan ba governu, aumenta forsa, nomos aumenta salariu ba ema sira neebe mak halo patroliamentu iha fronteira neeba,tanba sira mos iha osan mak lao, maibe dala ruma sira ba, maibe tenke fila tanba iha fen ho oan, depois sira fen ho oan se mak atu fo han.

Nunee mos, Deputadu Adriano do Nascimento, husi bankada PD dehan, NTT nee besik fronteira Suai, ida nee sai preokupasaun, madre nain 2 mate tiha ona, tanba virus iha Atambua, tanba nee mak fo hanoin hikas ba governu, karik bele forsa PNTL no F-FDTL no autoridade lokal iha fronteira Bobonaro, Covalima nomos Oecusse, tenke halo kontrolu.

“Ita nian F-FDTL no PNTL, inklui autoridade lokal, presiza halo vizilansia ba ita nian familia sira neebe hakat ba mai fronteira, ida nee hanesan rekomendasaun ida neebe mak hau nian rekomendasaun ba ita nian governu,” nia dehan.*

Reportajen: Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here