DILI-Polisia Nasional Timor-Leste (PNTL) sei estabelese postu polisia hamutuk rua nulu resin (20) resin hodi fo apoiu seguransa ba Natal no tinan foun 2020. PNTL mos sei fo swguransa ba viajen komunidade sira nian wainhira viajen ba munisipiu.
Ohin dia 16 komandu PNTL Dili semana ida liu ba ami simu ona ordem operasaun natal no tinan foun, no hahu ohin ba oin to loron 4 de Janeiru PNTL munisipiu Dili sei implementa operaasaun hodi bele garante selebrasaun natal no tinan foun 2019-2020, dehan Komandante Polisia Municipiu Dili (KPMD), Superintendente Xefe, Armando Monteiro iha nian knar fatin, KPMD, Kaikoli-Dili (16/12/2019).
Operasaun neebe polisia atu halao mak operasaun patrulamentu tatika, patroliamentu regular, alende ida nee mos iha operasaun intelejen, no operasaun atividade ba komunidade, no mos halo operasaun kontijente.
Operasaun hirak nee ami halo ho objetivu atu garantia seguransa ba sidadaun hotu hotu neébe mak atu festeza natal no tinan foun ida nee, dehan nia
Komandu PNTL munisipiu Dili hari ona postu polisia sanulu, postu tranzitu sanulu permanente durante oras 24 hodi bele fo atendementu ba sidadaun hotu hotu.
Komunidade neebe mak persiza asistensia hakbesik an ba postu polisia neebe besik, hodi hetan atendementu no informasaun relasiona ho operasaun, dehan Armando
Komandu PNTL Munisipiu Dili, harii postu vizilansia sanulu resin iha area neébe konsideira risku no engrafamentu hodi nunee kontrola movimentu komunidade no mos bele tau matan indikasaun violasaun regras.
Nia hatutan operasaun natal no tinan foun nee mos hetan apoiu hosi Unidade Espesial Polisia iha parte Leste no Oeste ninian hahu husi patrullamentu tatika, lao ain, halo barajen estrada, no mos postu movel.
Tipu operasaun hirak nee objetivu atu fo apoiu ba komandu munisipiu Dili ba ita nian selebrasaun natal no tinan foun, dehan nia.
Iha parte ketak tuir Peskizador Fundasaun Mahein Sancho Savier hatete patrullamentu PNTL nia iha terenu nee importante, tanba ikus-ikus nee numeru konflitu nee sae makas, liu-liu asaltu malu entre juventude sira hanesan sona malu, no hana malu ho rama ambon.
Hela deit loron hira sei tama ba loron selebrasaun natal ho tinan foun, no iha loron bot sira hanesan nee sempre mosu problema, tenik Sancho.
PNTL tuir Sancho tenke iha estratezia oinsa atu bele halo prevensaun ba problema sira neebe durante nee sai preokupasaun ema hotu nian, tanba iha tempu feriadu sempre mosu problema.
Sancho informa, vizibilidade PNTL nian labele tuir oras deit, maibe tenki 24 oras nia laran nee tenke halo patrullamentu, laos loron balun deit, tanba laos funsionariu publiku.
Nia admite, PNTL tenke hadia oras serbisu iha terenu, liu-liu patrulllamentu ka operasaun regular nee tenke akontese, tanba estratejia operasaun sira nee la muda, no hein deit ba iha operasaun sei la reduz problema iha rai laran.
Ami nia rekomendasaun mak tenke iha vizibilidade no prense fatin ka postu sira neebe monta ona iha estrada sira nee, hanesan postu sira iha suku no munisipiu sira nee, PNTL tenke prense labele husik mamuk, tanba wainhira vizibilidade iha postu sira nee iha signifika katak prezensa Polisia nia iha komunidade sira iha posibilidade neebe bot hodi prevene krime, argumenta Sancho.
Nunee mos Kordenador Media Observador Nasional Eleisaun Timor Leste Ronetil, Laurentino Alves dehan problema neebe akontese bebeik iha bairo iha kapital Dili, nee kestaun konsensia juventude sira nian nomos kestaun seguransa hahu husi aldeia ba to iha suku mak ladun funsiona ho diak.
Intrepretasaun entre juventude sira nia iha bairo laran katak Sancho dalaruma ladun intende malu ho diak, tanba ida idak ho nia karakter neebe la hanesan, defende nia maluk no grupu ou kor, tan nee wainhira iha kontestu laiha maneira atu rezolve. “Ami sujere diak liu funsionamentu Polisia Komunitaria iha suku laran tenke hametin liu husi operasaun no sosializasaun ho autoridade lokal kordenador juventude xefe seguransa iha bairo laran, tanba ho maneira sira hanesan nee mak sai hanesan opsaun alternativu ida atu koko minimiza akontesimentu neebe sai hanesan preokupasaun ema hotu nia iha rai nee,” nia esplika. ESTI-01