Atitude Naimori; Hamihis Publiku Nia Konfiansa Ba Prevensaun Covid-19

Defensor Direitu Humanu (DDH), Novelino do Santos. (Foto: STL/Santina Castro)

DILI, STLNEWS.co – Defensor Direitu Humanu (DDH), Novelino do Santos konsidera atitude neebe Konsilleiru Masimu Partidu KHUNTO, Naimori Bucar hatudu liu husi halo asaun karitativa ba vitima inundasaun sira, hamihis publiku nia konfiansa ba prevensaun Covid-19, tanba la kumpri regras neebe governu rasik hatuur.

Kestaun nee Novelino hatoo relasaun ho lidera Maximu Partidu KHUNTO, Naimori Bucar neebe foin sai husi auto izolamentu, ba halo asaun karitativa ba vitima inundasaun sira iha fatin balu.

Nia dehan, agradese ba asaun karitativa neebe senhor Naimori Bucar halo ona, hodi tulun maluk vitima inundasaun sira neebe infrenta hela situasaun moruk no triste iha vida sidade neebe nakonu haleu ho we merak, tanba akontese dezastre naturais iha loron Domingu foin lalais nee.

“Atu dehan deit katak, asaun karitativa neebe halo ho intensaun atu populariza aan ba publiku hodi demonstra deit saida mak nia halo, depois atu fo impaktu ba komunidade hodi transmite fali inimigu invisivel nee ba povu, hau hanoin katak nee moral laiha no la hatudu edukasaun diak ba komunidade sira atu kumpri regras prevensaun Covid-19 neebe governu rasik hatuur,” dehan nia ba STL, liu husi telefone, Kinta (08/04/2021).

Novelino hatutan, Naimori Bucar utiliza maskra hodi fahe sasan, maibe la taka maskra kompleto ka taka tomak ibun no inus, maibe Naimori Bucar hatun deit fali maskra nee ba keixu, ida nee fo risku tebes ba povu neebe halo kontaktu direita ho nia.

“Hau atu dehan katak, se hakarak aproveita momentu ida ema hotu preokupa no tauk ba prezensa inimigu mundial neebe kolonial hela, maibe lider sira hakarak fali populariza aan,” Novelino afirma.

Nia akresenta, lider sira rasik la kumpri ona, diak liu ba halimar filme komedi, nunee mundu gosta akompana (nonton), tanba filme komedian nee mos parte ida hodi ajuda psikologikamente ema humanu hodi anima nia aan, atu nunee bele famouzu lais liu iha mundu.

“Se lideransa politiku sira lahatudu ezemplu ba publiku ida nee, konserteza povu lakon konfiansa ba sira, satan atu kombate moras nee,” tenik nia.*

Bainhira notisias nee publika, STL seidauk halo konfirmasaun ba Konsilleiru Masimu Partidu KHUNTO, Naimori Bucar.

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here